భారతీయ సినిమా రంగంలో ఎప్పుడూ వివాదాలకు, సంచలన వ్యాఖ్యలకు కేరాఫ్ అడ్రస్గా నిలిచే రామ్ గోపాల్ వర్మ మరోసారి తన స్టైల్ లో ఘాటైన వ్యాఖ్యలతో ఇండస్ట్రీలో కొత్త చర్చకు తెరదీశారు. తాజాగా విడుదలైన ‘ధురంధర్ 2’ సినిమా గురించి ఆయన చేసిన వ్యాఖ్యలు ఇప్పుడు సోషల్ మీడియాలో హాట్ టాపిక్గా మారాయి.
ఆర్జీవీ ‘X’ వేదికగా ఈ విధంగా స్పందించారు. ‘ధురంధర్ 2’ ఒక సాధారణ సినిమా కాదు.. ఈ మూవీ ఫిల్మ్ ఇండస్ట్రీకి మరియు మేకర్స్ కి ఇచ్చిన గట్టి హెచ్చరిక. సంవత్సరాలుగా లాజిక్ లేకుండా, మాస్ మసాలా ఫార్ములాలతో, ప్రేక్షకుల తెలివిని తక్కువ చేసి చూసే సినిమాలపై ఇది ఒక గట్టిపంచ్ అని ఆయన అభిప్రాయపడ్డారు. “లాజిక్ లేకుండా సినిమా చూడాలి” అనే కల్చర్కు ఇది ఎండ్ కార్డ్ అని ఆయన స్పష్టం చేశారు.
ఈ సినిమాలో హీరోను దేవుడిలా చూపించకుండా, బలహీనతలు ఉన్న నిజమైన మనిషిగా చూపించారని వర్మ ప్రశంసించారు. గాల్లో ఎగిరే ఫైట్లు, గ్రావిటీని పట్టించుకోని యాక్షన్ సీన్స్పై ఆధారపడే పాత తరహా సినిమాలు ఇక పని చేయవని ఆయన పేర్కొన్నారు. ప్రేక్షకులు ఇప్పుడు రియాల్టీ, ఎమోషనల్ మరియు లోతైన కథనాలు ఉన్న కథలను కోరుకుంటున్నారని తెలిపారు.
పాన్ ఇండియా పేరుతో కేవలం లుక్స్, కాస్ట్యూమ్స్ మీద ఆధారపడే దర్శకులకు ఇది ఒక ముందస్తు హెచ్చరిక అని వర్మ వ్యాఖ్యానించారు. ‘ధురంధర్ 2’ కలెక్షన్లు ఆ పాత నమ్మకాలకి గట్టి సమాధి త్రవ్వుతున్నాయని ఆయన అన్నారు. చివరిగా, ప్రస్తుతం షూటింగ్లో ఉన్న లేదా కొత్తగా సినిమాలు ప్రారంభించబోయే దర్శకులకు వర్మ ‘ఇప్పటికైనా మారండి.. లేకపోతే మిమ్మల్ని ఎవ్వరూ కాపాడలేరు’ అని స్పష్టమైన సందేశం ఇచ్చారు.
