రామ్ గోపాల్ వర్మ శిష్యుడు అజయ్ భూపతి తొలి చిత్రంతోనే సంచలనం సృష్టించారు. అతను తెరకెక్కించిన ఆర్ఎక్స్ 100 మూవీ పక్క పరిశ్రమలవారికి తెలిసేలా విజయం సాధించింది. రెండున్నర కోట్లతో నిర్మితమైన ఈ సినిమా ఇరవైకోట్ల వసూళ్లను రాబట్టింది. అందుకే బాలీవుడ్ లో, కోలీవుడ్ లో రీమేక్ చేస్తున్నారు. తమిళ రీమేక్ హక్కుల్ని ప్రముఖ నటుడు ఆది పినిశెట్టి తీసుకున్నారు. అతను నటిస్తూ, నిర్మిస్తున్నారు. బాలీవుడ్ లో ‘ఆర్ఎక్స్ 100’ రీమేక్‌లో ప్రముఖ నటుడు సునీల్‌ శెట్టి కుమారుడు అహాన్‌ శెట్టి హీరోగా నటించే అవకాశాలు ఉన్నట్లు తెలిసింది. ఈ సినిమాను సాజిద్‌ నదియాద్‌వాలా నిర్మించనున్నట్లు సమాచారం.
“అహన్‌ కోసం చివరికి స్క్రిప్ట్‌ దొరికింది. తెలుగు హిట్‌ ‘ఆర్ఎక్స్ 100’ రీమేక్ హక్కుల్ని సాజిద్‌ నదియాద్‌వాలా సొంతం చేసుకున్నారు. మోహిత్‌ సూరి ఈ సినిమాకు దర్శకత్వం వహించనున్నారు. అహన్‌ చాలా బోల్డ్‌ కథతో పరిచయం కాబోతున్నారు” అని బాలీవుడ్ వర్గాలు తెలిపాయి. కార్తికేయ పోషించిన పాత్రను అద్భుతంగా పోషించడానికి ఇప్పటినుంచే అహన్‌ సాధన మొదలు పెట్టినట్టు టాక్. తెలుగు సినిమాలు కిక్, టెంపర్ సినిమాలు బాలీవుడ్ లో విజయం సాధించాయి. అలాగే “ఆర్ఎక్స్ 100” కూడా విజయం సాదిస్తుందని సినీ విశ్లేషకులు అంచనా వేస్తున్నారు.
