గల్వాన్ లోయలో మన సైన్యానికి, చైనా సైన్యానికి మధ్య జరిగిన భీకర ఘర్షణను సినిమాగా తీస్తున్న విషయం తెలిసిందే. ఆ సినిమాలో బాలీవుడ్ స్టార్ హీరో సల్మాన్ ఖాన్ ప్రధాన పాత్రధారి. ‘బ్యాటిల్ ఆఫ్ గల్వాన్’ పేరుతో ఆ సినిమాను కొన్ని నెలల క్రితం అనౌన్స్ చేశారు కూడా. అయితే ఇప్పుడు సినిమా టైటిల్ను మార్చేశారు. ఎందుకు మార్చారో చెప్పకుండా కొత్త టైటిల్తో పోస్టర్ను రిలీజ్ చేయడంతో ఏమైందా అనే గందరగోళం భారతీయ సినిమా అభిమానుల్లో ఉంది. మామూలు సినిమా అయితే ఈ పట్టింపు ఉండేది కాదు.. మన దేశ సైన్యం వీరత్వాన్ని, సంఘటనను తెలిపేలా ఉన్న టైటిల్ను మార్చడమే దీనికి కారణం.
అలా అని మార్చిన టైటిల్ బాగోలేదా అంటే చాలా బాగుంది అనే చెప్పాలి. ఎందుంకటే ‘మాతృభూమి’ అని పెట్టారు కాబట్టి. కానీ ఇక్కడ ప్రశ్న టైటిల్ ఎందుకు మార్చారు అనేదే. అన్నట్లు ఈ సినిమాలో సల్మాన్ పోషిస్తున్న పాత్ర తెలంగాణలోని సూర్యాపేటకు చెందిన కర్నల్ సంతోష్ బాబు అని అంటున్నారు. ఈ సినిమాకు దర్శకత్వం వహిస్తున్న అపూర్వ లాఖియా ఈ విషయంలో సంతోష్ బాబు కుటుంబంతో మాట్లాడారు అని ఓ టాక్ కూడా ఉంది. కాబట్టి ఈ సినిమా తెలుగు ప్రేక్షకులకు కూడా బాగా దగ్గరే. ఇక టైటిల్ మార్పు విషయానికొస్తే.. టీజర్ రిలీజ్ సందర్భంగా చైనా మీడియా కొన్ని విమర్శలు చేసిన విషయం ఇప్పుడు గుర్తు చేస్తున్నారు నెటిజన్లు.
చైనాపై వ్యతిరేకతను రెచ్చగొట్టేందుకు నాటి ఘటనను సినిమాలో వక్రీకరిస్తున్నారంటూ అక్కడి మీడియా తన అక్కసు వెళ్లగక్కింది. ఈ సినిమా జాతీయవాద మెలో డ్రామా అని కూడా అంది. ఇలాంటి సమయంలో ఈ టైటిల్ మార్పు ఎందుకు అనేదే ఇక్కడ ప్రశ్న. ఇక ఈ సినిమాను ఏప్రిల్ 17న విడుదల చేస్తారని తొలుత వార్తలొచ్చాయి. కానీ ఇప్పుడు ఆగస్టు 15న విడుదల చేస్తారని తెలుస్తోంది. దేశభక్తి నేపథ్యంలో సాగే ఈ సినిమాకు ఆ డేట్ సరైనదని టీమ్ అనుకుంటోందట.
