సినిమా ఇండస్ట్రీలో వెలుగుల్లో కనిపించే నటీనటుల జీవితాలు బయటికి ఎంతో గ్లామరస్గా కనిపిస్తాయి. కానీ ఆ వెలుగుల వెనుక వారు ఎదుర్కొనే వ్యక్తిగత పోరాటాలు చాలామందికి తెలియవు. తాజాగా నటి సమీరా రెడ్డి తన చిన్ననాటి అనుభవాల గురించి చెప్పిన మాటలు అందరినీ ఆలోచింపజేస్తున్నాయి.
ఒక ఇంటర్వ్యూలో మాట్లాడుతూ, తాను చిన్నప్పటి నుంచి మాట్లాడేటప్పుడు తడబడే సమస్యను ఎదుర్కొన్నానని ఆమె వెల్లడించింది. ఆ కారణంగా స్కూల్ దశలోనే పలువురి నుంచి వ్యంగ్య వ్యాఖ్యలు, అవమానాలు ఎదుర్కొన్నానని తెలిపింది. ఆ అనుభవాలు తన ఆత్మవిశ్వాసాన్ని బాగా దెబ్బతీశాయని, కొంతకాలం వరకు తనపై నమ్మకం కోల్పోయిన రోజులు కూడా ఉన్నాయని గుర్తుచేసుకుంది. ఆ పరిస్థితి నుంచి బయటపడటానికి ఆమె చాలా కాలం థెరపీ తీసుకోవాల్సి వచ్చిందని చెప్పింది.
ఇప్పటికీ మాట్లాడేటప్పుడు కొన్నిసార్లు తడబడితే, చుట్టుపక్కల వాళ్ల రియాక్షన్ తనను బాధపెడుతుందని సమీరా చెప్పింది. చిన్నప్పుడు మనపై పడే మాటలు, ట్యాగ్లు మన మనసులో అలాగే మిగిలిపోతాయని తన అనుభవం ద్వారా వివరించింది. అందుకే పిల్లలతో మాట్లాడేటప్పుడు చాలా జాగ్రత్తగా ఉండాలని ఆమె సూచించింది.
తన పిల్లలకు మాత్రం “ఒక లోపం మన వ్యక్తిత్వాన్ని నిర్ణయించదు” అని ఎప్పుడూ చెబుతానని సమీరా పేర్కొంది. విమర్శలకన్నా ప్రోత్సాహం, మద్దతు ఇస్తేనే పిల్లల్లో ఆత్మవిశ్వాసం పెరుగుతుందని ఆమె చెప్పుకొచ్చింది. ప్రస్తుతం ఆమె చేసిన ఈ వ్యాఖ్యలు సోషల్ మీడియాలో వైరల్ అవుతూ, పలువురి నుంచి స్పందనను అందుకుంటున్నాయి.
తెలుగు సహా పలు భాషల్లో స్టార్ హీరోల పక్కన హీరోయిన్ గా నటించిన సమీరా రెడ్డి, తన నటన మరియు గ్రేస్ డాన్సులతో ప్రేక్షకులను ఆకట్టుకున్న విషయం తెలిసిందే. చివరిగా కృష్ణం వందే జగద్గురుమ్ చిత్రం లో స్పెషల్ సాంగ్ లో కనిపించింది.
