సూర్యపై చాలా ఆశలు పెట్టుకొన్న ఢిల్లీ బ్యూటీ!

తెలుగులో కమర్షియల్ హీరోయిన్ గా నటించీ నటించీ బోర్ కొట్టి తమిళనాడు పయనమైన తాప్సీ అక్కడ నేషనల్ అవార్డ్ విన్నింగ్ ఫిలిమ్ లో నటించి తన సత్తా చాటుకొంది. ఆ తర్వాత కూడా తెలుగులో నటించినప్పటికీ.. మన తెలుగు దర్శకులు తాప్సీ నటన కంటే ఆమె అందచందాల మీదే ఎక్కువ కాన్సన్ ట్రేట్ చేయడంతో అమ్మడు బాలీవుడ్ కు పయనమైంది. అక్కడ కూడా తొలుత ఆమె అందాలకే ప్రిఫరెన్స్ ఇచ్చినప్పటికీ.. తెలుగులోకంటే త్వరగానే ఆమె అభినయ సామర్ధ్యాన్ని గుర్తించి “పింక్” సినిమాలో అవకాశమిచ్చారు. అమితాబ్ బచ్చన్ తో సమానమైన నట ప్రతిభ కనబరిచి తన ఉనికిని ఘనంగా చాటుకొంది తాప్సీ పన్ను.

ఇప్పుడు మరోమారు అదే స్థాయిలో లాయర్ గా తన ప్రతిభను ప్రూవ్ చేసుకోవడానికి ప్రయత్నిస్తోంది తాప్సీ. ఆమె నటించిన తాజా బాలీవుడ్ చిత్రం “ముల్క్”. అనిల్ కపూర్ ప్రధానపాత్ర పోషిస్తున్న ఈ చిత్రం ట్రైలర్ నిన్న విడుదలైంది. ఒక సాధారణ కుటుంబాన్ని సమాజం టెర్రరిస్ట్ ఫ్యామిలీ అనే ముద్ర వేయడానికి ప్రయత్నిస్తే ఒక లాయర్ ఆ అన్యాయాన్ని ఎలా ఎదిరించింది అనేది సినిమా కథాంశం. ఇంటెన్స్ కోర్ట్ రూమ్ డ్రామాగా తెరకెక్కిన ఈ చిత్రం ఆగస్ట్ 3వ తారీఖున విడుదలకు సిద్ధమైంది. తాప్సీ ప్రస్తుతం తెలుగులో “నీవెవరో” అనే సినిమాలో నటిస్తోంది. ఇది కాకుండా రెండు బాలీవుడ్ సినిమాలు ఆమె ఖాతాలో ఉన్నాయి.