సెట్స్ పైకి పవర్ స్టార్, మాటల మాంత్రికుడి మూవీ

పవర్ స్టార్ పవన్ కళ్యాణ్ వాయు వేగంతో సినిమాలను కంప్లీట్ చేసేందుకు సిద్ధమయ్యారు. కొంతకాలంగా పవన్ ఫ్యాన్స్ ని ఊరిస్తున్న మాటల మాంత్రికుడి కాంబినేషన్లో మూవీ త్వరలో పట్టాలెక్కనుంది. ప్రస్తుతం డాలీ దర్శకత్వంలో “కాటమరాయుడు” చిత్రీకరణలో పవన్ బిజీగా ఉన్నారు. ఈ సినిమా షెడ్యూల్ గ్యాప్ లో త్రివిక్రమ్ కోసం కొన్ని డేట్స్ కేటాయించారు. తమిళ సంగీత దర్శకుడు అనిరుద్ ఇప్పటికే పాటల కంపోజింగ్ లో నిమగ్నమయ్యారు.

“దేవుడే దిగి వచ్చినా..” అనే టైటిల్ తో తెరకెక్కనున్న ఈ చిత్రం ముహూర్తపు తేదీని తాజాగా ఫిక్స్ చేశారు. నవంబర్ 5 వ తేదీన పూజా కార్యాక్రమాలు జరిపి, వెంటనే రెగ్యులర్ షూటింగ్ చేయనున్నట్లు తెలిసింది.  “కాటమరాయుడు”, “దేవుడే దిగి వచ్చినా..” .. రెండింటిని సమాంతరంగా కంప్లీట్ చేయాలనీ పవన్ కళ్యాణ్ భావిస్తున్నారు. ఈ చిత్రాలు రిలీజ్ కాకముందే ఏఎం రత్నం నిర్మాణంలో పవర్ స్టార్ మరో చిత్రం సెట్స్ మీదకు వెళ్లనుంది. తమిళ దర్శకుడు నీశన్ డైరక్ట్ చేయనున్న ఆ సినిమాకు పూజా కార్య క్రమాలు దసరా రోజున నిర్వహించారు. పవన్ స్పీడ్ చూస్తుంటే వచ్చే ఏడాది మూడు చిత్రాలు రిలీజ్ కావడం పక్కాగా అయ్యేట్టు ఉన్నాయి.