Ustaad Bhagat Singh Trailer: పంచ్‌లు.. సెటైర్లు.. కౌంటర్లు.. ప్రాసలు.. అదిరిపోయిన ‘ఉస్తాద్‌ భగత్‌ సింగ్‌’ ట్రైలర్‌

తన అభిమాన హీరోతో ఓ దర్శకుడు సినిమా చేస్తే ఎలా ఉంటుందో, ఆ సినిమా క్లిక్‌ అయితే ఎలా ఉంటుందో ‘ఓజీ’ సినిమాతో చూపించారు దర్శకుడు సుజీత్‌. ఇప్పుడు ఆయన కంటే సీనియర్‌ ఫ్యాన్ పవన్‌ కల్యాణ్‌తో సినిమా చేశారు. అందులోనూ గతంలో ఓ బ్లాక్‌బస్టర్‌ ఇచ్చున్నారు కూడా. మరిప్పుడు ఎలాంటి సినిమా ఆశించొచ్చో చెప్పండి. అంతకుమించిన మాస్‌ ఎలిమెంట్స్‌, హై మూమెంట్స్‌, అంతకుమించిన కాన్ఫిడెన్స్‌ ఉండాలి. ఇప్పుడు ఈ సినిమా ట్రైలర్‌ వచ్చాక అదే కనిపించింది. ఒక్క ముక్కలో చెప్పాలంటే.. సినిమా గ్లింప్స్‌లో.. ఇప్పుడు ట్రైలర్‌ ఆఖరులో చెప్పినట్లు ‘పర్‌ఫార్మెన్స్‌ బద్ధలైపోయింది’.

Ustaad Bhagat Singh Trailer

‘ఉస్తాద్‌ భగత్‌ సింగ్‌’ సినిమా గురించి పవన్‌ కల్యాణ్‌ ఫ్యాన్స్‌ మంచి బజ్‌ ఉంది. అయితే ఈ సినిమా రీమేక్‌ అని తేలేసరికి ఎక్కడో చిన్న అసంతృప్తి మిగిలిపోయింది. కానీ దాన్ని ఎప్పుడైతే దర్శకుడు హరీశ్‌ శంకర్‌ క్లియర్‌ చేశారో.. మళ్లీ హైప్‌ మొదలైంది. ఇప్పుడు వారం ముందుకు సినిమా రావడంతో హైప్‌ డబుల్‌ అయింది. సినిమా ట్రైలర్‌లో ఎలిమెంట్స్‌ చూశాక ఇంకా ఇంకా పెరిగింది. ఎందుకంటే పంచ్‌లు, ఫైట్లు ఒకవైపు.. కౌంటర్లు, కత్తులు మరోవైపు.. సెటైర్లు, నవ్వులు ఇంకోవైపు.. మొత్తం వావ్‌ అనిపించారు పవన్‌ అండ్‌ హరీశ్‌.

‘‘వయెలెన్స్‌ అంటే మీనింగ్ తెలియని మీ అందరికీ ఓ ఫ్యాషన్‌ అయిపోయింది. చూపిస్తా అర్థం, భావం, అవసరం అన్నీ చూపిస్తా’’ అని ట్రైలర్‌ పవన్‌ మాస్‌ + యాక్షన్‌ చూపించగా.. ‘‘ఆయన కమ్‌ బ్యాక్‌ ఇచ్చిన ప్రతిసారీ మ్యాజిక్‌ జరుగుద్దీ’’ అని శ్రీలీల అనగానే ‘మా యమ్మే’ అంటూ ఆయన ఈజ్‌ కనిపించింది. ‘‘ప్రాస కోసం ప్రాణాలు తీసుకోవద్దు’’ అంటూ సెటైర్‌ పడితే.. ‘‘తెలుగు భాషలో నాకు నచ్చని ఒకే ఒక్క పదం డ్యాన్స్‌’’ అనే డైలాగ్‌తో కామెడీ పండింది. అందులో కామెడీ ఏముంది అనుకుంటున్నారా. ఆ డైలాగ్‌ తర్వాత ప్రవీణ్‌ వేసిన ‘డ్యాన్స్‌ తెలుగు పదం కాదు.. ఇంగ్లిష్‌ పదం..’ అనే కౌంటర్‌.. దానికి ‘ఇదెప్పుడు మార్చారురా’ అని పవన్‌ వేసి ఎన్‌కౌంటర్‌ అదిరిపోయాయి మరి.

‘‘ఈ కాళ్లు కదలాలని ఏళ్ల తరబడి నుండి ఎదురుచూస్తున్నాం అన్నా..’’ అంటూ ‘గబ్బర్‌ సింగ్‌’ బ్యాచ్‌ ఓ హిట్‌ సినిమాను, అందులో ఐకానిక్‌ సీన్‌ను సరదాగా గుర్తు చేస్తే.. ‘‘సంతోషంగా ఉండటం అంటే మన జీవితాన్ని మనం లైక్‌ చేయడం.. ఎవడెవడో లైక్‌లు కొట్టడం కాదు’’ అనే లైఫ్‌ లెసన్‌ కూడా వినిపించింది. ‘‘భగత్‌ సింగ్‌.. ఉస్తాద్‌ భగత్‌ సింగ్‌.. ఇచ్చి పడేసే గోత్రం.. ఇరగదీసే నక్షత్రం..’’ లాంటి వన్‌లైన్‌ పంచ్‌ మీకూ నచ్చే ఉంటుంది. ఆఖరున ‘‘ఈ దేశపు మగవాడు బొట్టు పెడితే ఎలా ఉంటుందో చూస్తావా’’ అంటూ కాస్త దేశభక్తి టచ్‌ కూడా ఇచ్చారు.

ఇక పవన్‌ కల్యాణ్‌ యాక్టింగ్‌ అదిరిపోయిందని.. శ్రీలీల – రాశీ ఖన్నా అందంగా కనిపించి మెప్పించారని.. తమన్‌ నేపథ్య సంగీతం బాగుందని ప్రత్యేకంగా చెప్పాల్సిన అవసరం లేదు. అదన్నమాట మేటర్‌. ఇక మార్చి 19 కోసం రెడీ అపోవడమే. ఆ రోజేగా వెండితెర మీద ‘పర్‌ఫార్మెన్స్‌ బద్ధలైపోయేది’.

డబుల్ డిజాస్టర్ గా మిగిలిన ‘వార్ 2’