‘సైంధవ్‌’ (Saindhav) సినిమా తర్వాత ఇప్పటివరకు వెంకటేశ్ కొత్త సినిమా స్టార్ట్‌ చేయలేదు. 75వ సినిమాగా సంక్రాంతికి వచ్చిన ఈ సినిమా బాక్సాఫీసు దగ్గర ఆశించిన ఫలితం అందుకోలేదు. ఇప్పటికి అంటే సుమారు ఆరు నెలల తరవాత కొత్త సినిమాకు కొబ్బరికాయ కొట్టబోతున్నారు. ఇప్పటికే ఈ సినిమాకు సంబంధించి అనౌన్స్‌మెంట్‌ అయిపోయింది. ఆ తర్వాత చాలా పుకార్లు వచ్చాయి. ఇప్పుడు వాటిని నిజం చేస్తూ సినిమా హీరోయిన్లు ఫిక్స్‌ అయిపోయారు. ముహూర్తం డేట్ కూడా ఇచ్చేశారు.
వెంకటేశ్ (Venkatesh) , అనిల్ రావిపూడి (Anil Ravipudi) కాంబినేషన్‌లో దిల్‌ రాజు (Dil Raju) నిర్మాణంలో ఈ సినిమా రూపొందబోతోంది. ఈ చిత్రాన్ని బుధవారం పూజా కార్యక్రమాలతో లాంఛనంగా ప్రారంభించనున్నారు. ఈ సందర్భంగా రిలీజ్‌ చేసిన పోస్టర్ ఇంట్రెస్టింగ్‌గా ఉంది. ట్రయాంగిల్ ఎంటర్‌టైనర్‌గా రూపొందనున్న ఈ సినిమా ఎక్సలెంట్ వైఫ్, ఎక్స్ కాప్, ఎక్స్ గర్ల్ ఫ్రెండ్ మధ్య నడుస్తుందని చెబుతున్నారు. ఆ విషయాన్ని హింట్‌ ఇచ్చేలా Ex అని పోస్టర్ మీద ప్రముఖంగా రాసుకొచ్చారు. దాంతోపాటు తాళి, గన్, గులాబీ పువ్వును పోస్టర్‌పై పెట్టారు.
ఇక ఈ సినిమాలో పైన చెప్పిన కాన్సెప్ట్‌కి తగ్గట్టుగా ఇద్దరు నాయికలు ఉంటారు. ఒకరు మీనాక్షి చౌదరి (Meenakshi Chaudhary) కాగా, రెండో అమ్మాయి ఐశ్వర్య రాజేశ్‌ (Aishwarya Rajesh) . ఇందులో భార్యగా ఐశ్వర్య, మాజీ ప్రేయసిగా మీనాక్షి నటిస్తారు. సోమవారం బాపట్ల జిల్లాలోని శింగరకొండ ప్రసన్నాంజనేయస్వామి దేవస్థానాన్ని దర్శించుకున్న దర్శకుడు అనిల్ రావిపూడి స్వామి వారి పాదాల వద్ద స్క్రిప్టు ఉంచి పూజలు చేశారు.
ఇక ఈ సినిమాను నవంబరు నాటికి పూర్తి చేసి.. సంక్రాంతికి తీసుకొస్తామని చెప్పారు. ఇక సినిమాకు ‘సంక్రాంతికి వస్తున్నాం’ అనే పేరు పరిశీలిస్తున్నట్లు సమాచారం. ఇప్పటికే వెంకీ – అనిల్ కాంబినేషన్‌లో వచ్చిన ‘ఎఫ్‌ 2’, (F2 Movie) , ‘ఎఫ్‌ 3’ (F3 Movie) భారీ విజయంతోపాటు మంచి నవ్వులు పంచాయి. ఇప్పుడు ఈ మూడో సినిమా ఎలాంటి విజయం అందుకుటుందో, ఎలాంటి నవ్వులు పూయిస్తుందో చూడాలి.
