With Love Review in Telugu: విత్ లవ్ సినిమా రివ్యూ & రేటింగ్!

అలా మొదలైన వాళ్ల జర్నీ, చిత్రమైన మలుపులు తిరుగుతుంది. చివరికి వాళ్ల ప్రయాణం ఏ తీరానికి చేరింది? అనేది “విత్ లవ్” కథాంశం.

నటీనటుల పనితీరు: అనశ్వర రాజన్ మొన్నటివరకు కాస్త సైలెంట్ రోల్స్ ప్లే చేసి.. ఈ సినిమాలో కాస్త డామినేట్ చేసే పాత్రలో కనిపించేసరికి కొత్తగా కనిపించింది. ఆమె స్క్రీన్ ప్రెజన్స్, క్యారెక్టరైజేషన్ బాగున్నాయి. ఆమె వయసుకి తగ్గ పాత్ర కావడంతో చక్కగా ఒదిగిపోయింది. ముఖ్యంగా స్కూల్ పోర్షన్స్ లో అనస్వర భలే చూడముచ్చటగా ఉంది.

అభిషణ్ కూడా కొత్త నటుడు అని ఎక్కడా అనిపించదు. ఒక సగటు కుర్రాడిగా చక్కగా జీవించేశాడు. ముఖ్యంగా కామెడీ బాగా వర్కవుట్ చేశాడు. క్లైమాక్స్ లో తాగేసి ఫ్రెండ్స్ కి ఫోన్లు చేసే సీన్ భీభత్సంగా పేలింది.

మిగతా నటీనటులందరూ తమ పాత్రలకి న్యాయం చేశారు.

సాంకేతికవర్గం పనితీరు: ముందుగా ఈ సినిమా తెలుగు వెర్షన్ కోసం తీసుకున్న జాగ్రత్తల గురించి చెప్పుకోవాలి. దాదాపుగా ఎక్కడా తమిళ అక్షరాలు కనబడకుండా జాగ్రత్తపడ్డారు. అలాగే.. తెలుగు వెర్షన్ కోసం దేవిశ్రీప్రసాద్ ఫోటో వాడడం బాగుంది. త్రిచ్చిని తుని అంటూ కవర్ చేయడానికి విశ్వప్రయత్నం చేసినప్పటికీ.. అథెంటిసిటీ మిస్ అయ్యింది. కాకపోతే.. కామెడీ కారణంగా దాన్ని అంతగా ఎవరూ కేర్ చేయరు. డబ్బింగ్ డైలాగ్ వెర్షన్ కూడా బాగా రాసుకున్నారు. తెలుగు మీమ్స్ ని ఇంక్లూడ్ చేసిన విధానం అలరిస్తుంది.

దర్శకుడు మదన్, మనం ఆల్రెడీ “నా ఆటోగ్రాఫ్, 96” లాంటి సినిమాల్లో చూసేసిన ఎమోషన్ నే సరికొత్తగా చూపించాడు. ముఖ్యంగా.. హీరోహీరోయిన్లు యంగ్ గా ఉండడం, స్కూల్ పోర్షన్స్ కి కూడా వాళ్లు యాప్ట్ గా సరిపోవడం మంచి నాస్టాల్జియా ఫీల్ ఇచ్చింది. ఇక కథనం కంటే.. సందర్భాల మీద ఎక్కువ శ్రద్ధ పెట్టడం ప్లస్ అయ్యింది. ఆల్మోస్ట్ ప్రతి సందర్భం, సన్నివేశం రిలేటబుల్ గా ఉంది. పాత్రల్లో మనల్ని మనం చూసుకుంటాం. హాస్యం మాత్రమే కాక.. దానికి తగ్గ ఎమోషన్ ను కూడా పండించిన విధానం హర్షణీయం. అంతర్లీనంగా జీవితాన్ని మనం చూసే కోణం ఎలా ఉండాలి అనేది కూడా హృద్యంగా చెప్పిన విధానం అలరిస్తుంది. ఫస్ట్ బాల్ తోనే సిక్స్ కొట్టాడు దర్శకుడు మదన్.

సియాన్ రోల్డన్ పాటలు బాగున్నాయి. సాహిత్యం విషయంలో ఇంకాస్త కేర్ తీసుకుని ఉంటే బాగుండేది. తెలుగు వెర్షన్ కోసం తమిళ ట్యూన్స్ లో తెలుగు పదాలు ఇరికించినట్లుగా ఉంది కానీ.. సరైన భావం వినిపించలేదు.

ఆర్ట్ & ప్రొడక్షన్ టీమ్ పనితనం సినిమాకి మేజర్ హైలైట్. సినిమాలో కనిపించేవి తిప్పి కొడితే ఓ 5 లొకేషన్లు. వాటిని రకరకాల యాంగిల్స్ లో రిపిటీటివ్ ఫీల్ కలగకుండా చిత్రించిన విధానం బాగుంది. అందుకు సినిమాటోగ్రాఫర్ శ్రేయాస్ కృష్ణ కూడా అభినందనీయుడు. లొకేషన్స్ కంటే.. కంటెంట్ క్వాలిటీని ఎలా బెటర్ చేయొచ్చు అనే విషయంలో బడ్జెట్ ను వాడుకున్నారు.

విశ్లేషణ: తెలుగు డబ్బింగ్ వెర్షన్ రిలీజ్ అనే డెసిషన్ ఆఖరి నిమిషంలో తీసుకోవడంతో.. “విత్ లవ్” సినిమా తెలుగు రాష్ట్రాల్లో విడుదలైందన్న విషయం చాలామందికి తెలియదు. టైటిల్ కూడా ఒకరకంగా మైనస్. అయితే.. టీమ్ కాస్త ఓపిగ్గా తెలుగు రాష్ట్రాల్లో ప్రమోట్ చేస్తే మరో “ప్రేమలు” రేంజ్ హిట్ అందుకొనే లక్షణాలు పుష్కలంగా ఉన్న సినిమా ఇది. మంచి హెల్తీ ఫన్, హిలేరియస్ ఎపిసోడ్స్ & ఎంగేజింగ్ ఎమోషన్స్ ఉన్న “విత్ లవ్” మస్ట్ వాచ్ అని చెప్పడంలో ఎలాంటి అతిశయోక్తి లేదు.

ఫోకస్ పాయింట్: మంచి ఫీల్ గుడ్ సినిమా!

రేటింగ్: 3.5/5