సంక్రాంతికి ఇంకా 11 నెలలు ఉంది అప్పుడే సంక్రాంతి సీజన్‌ గురించి, అప్పటి సినిమాల గురించి ఏంటి? అనుకుంటున్నారా? ఆ పొంగల్‌కి వచ్చ సినిమాలేంటో తెలిస్తే మీరు ఈ మాట అనరు. ఎందుకంటే టాలీవుడ్‌ టాప్‌ మోస్ట్‌ హీరోల సినిమాలు వచ్చే సంక్రాంతి బరిలో దిగడానికి సిద్ధమవుతున్నాయి. అయితే ఆ సమయం వచ్చేసరికి ఏవి ఉంటాయి, ఏవి పక్కకు తప్పుకుంటాయి అనేది పక్కనపెడితే… ఇప్పుడైతే ఆ సినిమాలు వస్తాయనే మాటే అద్భుతంగా అనిపిస్తోంది. ఇంతకీ ఏంటా సినిమాలో చూద్దామా!
ముందుగా ఈ ఏడాది సంక్రాంతి సినిమాల గురించి కాసేపు మాట్లాడుకుందాం. పాన్‌ ఇండియా స్థాయిలో ఈ సారి సంక్రాంతి సినిమాల సీజన్‌ ఉంటుంది అని అనుకుంటే… ఒక్కటే పెద్ద సినిమాతో సరిపెట్టుకోవాల్సి వచ్చింది. ‘ఆర్‌ఆర్‌ఆర్‌’, ‘రాధేశ్యామ్‌’, ‘భీమ్లా నాయక్‌’, ‘సర్కారు వారి పాట’ లాంటి స్టార్‌ హీరోల సినిమాలు వస్తాయి అని తొలుత ప్రకటించారు. అయితే వివిధ కారణాల వల్ల ఒకటి తర్వాత ఒకటి వాయిదా పడుతూ వచ్చాయి. ఆఖరికి అప్పటివరకు చర్చల్లో లేని సినిమాలు విడుదల అయ్యాయి.
నాగార్జున – నాగచైతన్య ‘బంగార్రాజు’, అశోక్‌ గల్లా ‘హీరో’, ఆశిష్‌ రెడ్డి ‘రౌడీ బాయ్స్‌’, కళ్యాణ్‌ దేవ్‌ ‘సూపర్‌ మచ్చి’ థియేటర్స్‌లోకి వచ్చాయి. ఆ సినిమాలు ఎలాంటి విజయం సాధించాయి అనే చర్చ ఇప్పుడు అప్రస్తుతం. ముందు అనుకున్నట్లు పాన్‌ ఇండియా సినిమాలు వచ్చి ఉంటే ఈ సంక్రాంతి బ్లాక్‌ బస్టర్‌ హిట్‌ అయ్యేది. అయితే 2022 కోరిక 2023 తీరుస్తుంది అంటున్నాయి టాలీవుడ్‌ వర్గాలు. 2023 జనవరి రిలీజ్‌లు అంటూ మూడు సినిమాల గురించి ఇప్పుడు చర్చ నడుస్తోంది.
ఆ లెక్కన 2023 సంక్రాంతి పుంజులు మహేష్‌బాబు, అల్లు అర్జున్‌, రామ్‌చరణ్‌. అవును ఈ ముగ్గురు స్టార్‌ హీరోలే వచ్చే పొంగల్‌ పుంజులు. దిల్‌ రాజు – శంకర్‌ – రామ్‌చరణ్‌ సినిమా ప్రారంభం అయినప్పుడు సంక్రాంతికి వస్తున్నాం అని చెప్పేశారు. అందులో దిల్‌ రాజు నుండి ప్రతి సంక్రాంతికి సినిమా ఉంటుంది. అందులోనూ తన బ్యానర్‌లో 50వ సినిమాగా రూపొందుతున్న చిత్రమిది. దీంతో సంక్రాంతి సీజన్‌ పక్కా అంటున్నారు.
మహేష్‌ బాబు – త్రివిక్రమ్‌ కాంబినేషన్‌లో ఓ సినిమా రూపొందనున్న విషయం తెలిసిందే. 11 ఏళ్ల తర్వాత ఈ కాంబోలో రూపొందుతున్న చిత్రమిది. ‘అతడు’, ‘ఖలేజా’ తర్వాత వస్తుండటంతో భారీ అంచనాలు ఉన్నాయి. త్వరలో సినిమా ప్రారంభించి వచ్చే సంక్రాంతికి విడుదల చేయాలని చూస్తున్నారట. ఇక బోయపాటి శ్రీను – అల్లు అర్జున్‌ కలయికలో రూపొందబోయే సినిమా కూడా సంక్రాంతినే టార్గెట్‌ చేసింది అంటున్నారు. ‘పుష్ప 2’ తర్వాత బన్నీ వీలైనంత త్వరగా ఈ సినిమా సిద్ధం చేసి వచ్చే పెద్ద పండగకి విడుదల చేయాలని అనుకుంటున్నారట.అలా 2023 సంక్రాంతి మామూలుగా ఉండదు. అయితే వీరిలో ఆ రోజుకి ఎవరు నిలబడతారు, ఎవరు వాయిదా పడతారు అనేది నిర్మాతల ఆలోచన మీద ఉంటుంది. ఒకవేళ ముగ్గురూ వస్తే మాత్రం 2023 సంక్రాంతి… అదిరిపోద్ది అంతే.
Most Recommended Video
చైసామ్, ధనుష్- ఐస్ లు మాత్రమే కాదు సెలబ్రిటీల విడాకుల లిస్ట్ ఇంకా ఉంది..!
ఎన్టీఆర్ టు కృష్ణ.. ఈ సినీ నటులకి పుత్రశోఖం తప్పలేదు..!
20 ఏళ్ళ ‘టక్కరి దొంగ’ గురించి ఎవ్వరికీ తెలియని కొన్ని విషయాలు..!
Home