ప్రస్తుతం తెలుగు సినీ అభిమానులు ఎంతగానో ఎదురుచూస్తున్న సినిమాల్లో ఎన్టీఆర్ బయోపిక్ ఒకటి. ఈ చిత్రం అనేక అడ్డంకులను అధిగమించి గతవారం సెట్స్ మీదకు వెళ్ళింది. మనదేశం సినిమాతోనే నటుడిగా ఎన్టీఆర్ ప్రస్థానం మొదలయింది. అందుకే అదే గెటప్ తోనే తొలిషాట్ ని క్రిష్ తెరకెక్కించారు. మహానటుడు భార్య బసవతారకమ్మ పాత్రలో బాలీవుడ్ బ్యూటీ విద్యాబాలన్ నటిస్తోంది. ఏఎన్నార్ గా సుమంత్, కృష్ణ గా సుధీర్ బాబు, చంద్రబాబు నాయుడిగా రానా నటించనున్న ఈ చిత్రంలో నరేష్ ఓ కీలకరోల్ పట్టేసారు. ఈ మధ్య నరేష్ అనేక మంచి రోల్స్ అందుకుంటున్నారు. మహానటి లోను అద్భుత రోల్ పోషించి అభినందనలు అందుకున్నారు.
సాయి కొర్రపాటి, విష్ణు ఇందూరిలతో కలిసి బాలయ్య నిర్మిస్తున్న ఈ ఎన్టీఆర్ బయోపిక్ లో ప్రఖ్యాత నిర్మాత బొగట వెంకట సుబ్బారావు పాత్రలో కనిపించనున్నారు. బీఏ సుబ్బారావుగా పాపులర్ అయిన ఇతను ఎన్టీఆర్ కి హీరోగా అవకాశం ఇచ్చారు. తాను నిర్మించిన “పల్లెటూరి పిల్ల” చిత్రం ద్వారా ఎన్టీఆర్ హీరోగా నిలదొక్కుకున్నారు. ఆ తర్వాత ఎన్టీఆర్, సుబ్బారావులు కలిసి చాలా సినిమాలు తీశారు. సుబ్బారావు సొంతంగా ‘బీఏ’ ప్రొడక్షన్ ను స్థాపించి చెంచులక్ష్మి, భీష్మ సినిమాలను తీశారు. ఎన్టీఆర్ కు మంచి మిత్రుడిగా కొనసాగారు. అటువంటి సుబ్బారావు పాత్రను నరేష్ పోషించనున్నారు. భారీ తారాగణం తో తెరకెక్కుతోన్న ఈ బయోపిక్ సంక్రాంతికి థియేటర్లోకి రానుంది.
