దక్షిణాది చిత్ర పరిశ్రమల్లో నెగిటివ్, పాజిటివ్ అని తేడా లేకుండా అన్ని పాత్రలను అద్భుతంగా పోషించగల నటుడు ప్రకాష్ రాజ్. ఇందులో ఎటువంటి డౌట్ లేదు. అనేక తెలుగు సినిమాలు సూపర్ హిట్ కావడానికి అతని నటనకూడా దోహదం చేసిందనే విషయం వాస్తవం. ఆ విజయ గర్వమో.. బిజీ షెడ్యూల్ కారణమో తెలియదు గానీ ప్రకాష్ రాజ్ షూటింగ్ కి ఆలస్యంగా వస్తుంటారని అనేకమంది నిర్మాతలు చెప్పారు. ప్రకాష్ రాజ్ సరైన సమయానికి లొకేషన్ కి రారని కొన్ని సార్లు నిర్మాత‌ల మండ‌లికి ఫిర్యాదులు అందిన సంగతి తెలిసిందే. అంతేకాదు నోటి దురుసు కూడా ఎక్కువేన‌ని టాక్. ఆగడు సినిమా సమయంలో శ్రీనువైట్ల, ప్రకాష్ రాజ్ కి మధ్య గొడ‌వ జరిగింది. తాజాగా ప్రముఖ నిర్మాత అశ్వినీదత్ కూడా ప్రకాష్ రాజ్ ని అభినందిస్తూనే చురకలు అంటించారు.
దర్శకుడు నాగ్ అశ్విన్ దర్శకత్వంలో సావిత్రి బయోపిక్ మూవీ మహానటి తెరకెక్కుతోంది. అశ్వినీదత్ కుమార్తె స్వప్న దత్ “స్వప్న సినిమా” పతాకంపై ఈ చిత్రాన్ని నిర్మిస్తున్నారు. ఇందులో అలనాటి సీనియర్ నటుడు పాత్రను ప్ర‌కాష్‌రాజ్‌ పోషిస్తున్నారు. అతని పనితీరు గురించి తాజాగా అశ్వినీదత్ ట్విట్టర్లో పోస్ట్ పెట్టారు. “ఆయ‌న్ని లొకేష‌న్‌కి ర‌ప్పించ‌డం క‌ష్టం. ఒక‌వేళ వ‌చ్చారంటేనా.. కార‌వ్యాన్ అవసరం లేదు. బ్రేక్ అఖ్క‌ర్లేదు. నో ప్లేబ్యాక్‌“ అంటూ ట్వీట్ చేయడం టాక్ ఆఫ్ ది టాలీవుడ్ అయింది. ఈ ట్వీట్ తర్వాత అయినా ప్రకాష్ రాజ్ తన తీరు మార్చుకుంటే అతనికి, పరిశ్రమకి మంచిదని సినీ విశ్లేషకులు భావిస్తున్నారు.
