బాలకృష్ణ(Balakrishna) సినిమాల టైటిల్స్ అన్నింటిలో ‘సింహం’ ఉంటుంది అని అనం కానీ.. చాలా వరకు ఆయన హిట్ సినిమాల్లో ‘సింహం’ పక్కగా ఉంటుంది. అది ఏ లాంగ్వేజ్ అయినా ‘సింహం’ పక్కా. అయితే బాబీ డైరక్షన్లో కొత్తగా తెరకెక్కుతున్న సినిమా టైటిల్లో సింహం ఉండదు అని చెబుతున్నారు. అన్నీ అనుకున్నట్లుగా జరిగితే కింద చెప్పబోయే రెండు టైటిల్స్లో ఒకటి ఉండొచ్చు అని చెబుతున్నారు. ప్రతి సంక్రాంతికి బాలయ్య నుండి ఓ సినిమా రావడం..
ఆ సినిమా టీజర్ దసరా సందర్భంగా రావడం మనకు తెలిసిన విషయమే. ఈసారి కూడా అలాంటి ప్రయత్నమే చేస్తున్నారు. అయితే చిన్న మార్పు ఉంది. బాబీ (Bobby) దర్శకత్వంలో రూపొందుతున్న ఆ సినిమాకు సంబంధించి పోస్టర్ దసరాకు ఇచ్చి.. దీపావళికి టీజర్ ఇద్దామనే ఆలోచనలో ఉన్నారట. ఈ క్రమంలో సినిమాకు అనుకుంటున్న రెండు టైటిల్స్ బయటకు వ్చాయి. సినిమా నేపథ్యం బట్టి ఒక సినిమా పేరు అనుకోగా.. సినిమాలోని మెయిన్ ట్విస్ట్ను చెప్పేసేలా మరో టైటిల్ ప్లాన్ చేశారట.
సినిమాలో బాలయ్య ఓ బందిపోటులా కనిపిస్తాడు అని గతంలో తెలిసింది. కాన్సెప్ట్ పోస్టర్లోనూ ఆ అంశాలే ఉన్నాయి. అందుకే ‘డాకూ మహారాజా’ అని పెడదాం అనుకుంటున్నారట. ఇక సినిమాలో అసలు ట్విస్ట్ చెప్పేలా ‘సర్కార్ సీతారామ్’ అని కూడా పెట్టొచ్చు అని చెబుతున్నారు. ఈ రెండింటిలో ఒకటి ఫిక్స్ చేసే అవకాశాలు ఉన్నాయి. ఇందులో ఎక్కువమంది ఆలోచన ‘డాకూ మహారాజా’తోనే ఉందట.
మరి ఏ పేరు పెడతారో చూడాలి. ఇక ఈ సినిమా డిసెంబరు ఆఖరున కానీ, సంక్రాంతికి కానీ తీసుకొస్తారని టాక్. ఆ విషయంలో ఈ రోజు క్లారిటీ వచ్చేస్తుంది అని చెబుతున్నారు. ఒకవేళ ఇప్పుడు చెప్పకపోతే దీపావళికి చెబుతున్నారు. డిసెంబరులో కానీ బాలయ్య రాకపోతే.. ‘పుష్ప: ది రూల్’కి (Pushpa 2) మరిన్ని రోజులు ఇచ్చినట్లే అని చెప్పాలి. చూద్దాం బాలయ్య ముహూర్తాల లెక్క ఏం చెబుతుందో?
