స్టార్ హీరోయిన్ అవ్వడానికి కావాల్సిన అందం, అభినయం, ఫిజిక్, మ్యాజిక్ అన్నీ ఉన్న కథానాయిక భాగ్యశ్రీ భోర్సే. అయితే ఎక్కడో అదృష్టం కలసి రావడం లేదు. అందుకే ఇండస్ట్రీలోకి వచ్చి రెండేళ్లు అవుతున్నా.. సరైన విజయం దక్కడం లేదు. ఒకట్రెండు సినిమాల్లో విజయం అంచువరకు వచ్చి వెనక్కి వెళ్లిపోయింది. ఈ క్రమంలో ఆమె నాలుగు సినిమాలు చేసేసింది. ఇప్పుడు చేతిలో మరో సినిమా ఉంది. ఆ సినిమా సంగతి తేలడం లేదు. ఎప్పుడొస్తుందో చెప్పలేకపోతున్నారు.
తెలుగులో చేసిన ప్రయత్నాలు చాలు అనుకుందో, లేక తమిళనాట కూడా ఓ ట్రయల్ వేసి ఎక్కడ సమస్య ఉంది అనేది పరిశీలిద్దాం అనుకుందో ఏమో.. ఓ కోలీవుడ్ సినిమాకు ఓకే చెప్పింది అని సమాచారం. శివకార్తికేయన్ హీరోగా తెరకెక్కుతున్న ‘సెయాన్’ సినిమాలో భాగ్యశ్రీ భోర్సే నటిస్తోందని సమాచారం. ఇటీవల రాధికతో ‘తాయ్ కిళవి’ అనే ప్రయోగాత్మక చిత్రం చేసిన శివకుమార్ దర్శకత్వంలో ఈ సినిమా రూపొందుతోంది.
గ్రామీణ నేపథ్యంలో రూపొందుతున్న ఈ సినిమాను పతాకం కమల్ హాసన్ నిర్మిస్తున్నారు. కొన్ని రోజుల క్రితమే ఈ సినిమాను అనౌన్స్ అయినా.. ఇప్పటివరకూ కథానాయిక ఎవరన్నది చిత్రబృందం ప్రకటించలేదు. ఇప్పుడు కూడా చెప్పలేదు కానీ.. భాగ్యశ్రీ బోర్సే దాదాపు ఖరారు అని చెబుతున్నారు. త్వరలోనే ఈ సినిమా టీమ్ అధికారిక ప్రకటన చేస్తుందని చెబుతున్నారు. ఈ సినిమానే కాదు మరో కోలీవుడ్ సినిమా కూడా డిస్కషన్లో ఉందని చెబుతున్నారు. ఒకవేళ అక్కడ విజయం దక్కితే భాగ్యశ్రీ కొన్నేళ్లు అక్కడే ఉండిపోవచ్చు.
ఇక ఆమె తెలుగు సినిమాల సంగతి చూస్తే.. రవితేజ ‘మిస్టర్ బచ్చన్’తో కెరీర్ స్టార్ట్ చేసింది. ఆ తర్వాత విజయ్ దేవరకొండ ‘కింగ్డమ్’, దుల్కర్ సల్మాన్ ‘కాంత’, రామ్ ‘ఆంధ్రా కింగ్ తాలూకా’ వచ్చాయి. ఇవన్నీ ఇబ్బందికర ఫలితాన్నే అందుకున్నాయి. తొలి సినిమా అందాల తారగా గుర్తింపు నివ్వగా.. ‘కాంత’ మంచి నటిగా పేరు ఇచ్చింది. ఇప్పుడు చాలా నెలలుగా తెరకెక్కుతున్న అఖిల్ ‘లెనిన్’ ఏం చేస్తుందో చూడాలి. అన్నట్లు ఆమె తెలుగులో ఓ హీరోయిన్ ఓరియెంటెడ్ సినిమా కూడా చేస్తోందట.
