బాలీవుడ్ కి ఇది “బ్రేకప్ నామ సంవత్సరం”

మన తెలుగు సంవత్సరాలకు “విరోధి, దుర్ముఖి” నామ సంవత్సరాలు అని పేర్లున్నట్లుగా.. బాలీవుడ్ కి ఈ ఏడాది “బ్రేకప్ నామ సంవత్సరం” అని పేరు ఫిక్స్ చేసేస్తే సరి. అందుకు కారణంగా ప్రత్యేకంగా చెప్పాల్సిన అవసరం లేదనుకుంటా. ఈ ఏడాది మొదటి నుంచి ఇప్పటివరకూ ఏదో ఒక కారణంగా ఎవరో ఒక జంట విడిపోతూనే ఉన్నారు. పెళ్ళైన వారు విడాకులకు సిద్ధమవుతుండగా.. పెళ్ళి చేసుకోకుండా “లివ్ ఇన్ రిలేషన్ షిప్”లో ఉన్నవాళ్ళందరూ.. సింగిల్ గా మారిపోతున్నారు.

హృతిక్ రోషన్, ఫర్హాన్ అక్తర్, బాబీ డియోల్, సుశాంత్ సింగ్ రాజ్ పుట్, అనుష్క శర్మ, మలైకా అరోరా, శిల్పాశెట్టి.. ఇలా చెప్పుకొంటు పోతే చాలా మంది ఉన్నారు. తాజాగా ఈ జాబితాలో చేరేందుకు ఉవ్విళ్ళూతున్నాడు బాలీవుడ్ కండల వీరుడు జాన్ అబ్రహాం. బిపాసాతో సాగిన లివి ఇన్ రిలేషన్ అనంతరం రెండేళ్లకు ముందు తన సన్నిహితురాలు ప్రియాను వివాహమాడిన జాన్ ఇప్పుడు ఆమెతో తెగదెంపులు చేసుకొనేందుకు సన్నద్ధమవుతున్నాడట. వీళ్ళ “బ్రేకప్” కి గొడవలు, అనుమానాలు కారణం కాదంట. వీళ్ళ కెరీర్ ల కారణంగానే వీరిద్దరి మధ్య గ్యాప్ వస్తోందని, ఇద్దరికీ పొసగడం లేదని, అందుకే బ్రేకప్ అయిపోతున్నారని చెబుతున్నారు వారి సన్నిహితులు!