ప్రస్తుతం టాలీవుడ్ లో చిరు 151, ఎన్టీఆర్ తర్వాతి సినిమాలపై ఏ స్థాయిలో చర్చ జరుగుతుందో దర్శకుడు చందు మొండేటి ఏ హీరోతో సినిమా చేస్తాడు అన్నదానిపైనా అంతే చర్చ జరుగుతోంది. ఇదంతా అతడి గత రెండు సినిమాల ఫలితమే అన్నది తెలియంది కాదు. ఎన్టీఆర్ సహా పలువురు హీరోలు అతడితో సినిమా చేసేందుకు సుముఖత తెలుపగా చందూ మాత్రం ఓ ఇద్దరు హీరోల కోసం కథలు సిద్ధం చేస్తున్నాడట.
అందులో మొదటిస్థానంలో ఉన్నది కింగ్ నాగార్జున. సినిమా పరిశ్రమకు రాకముందే నాగార్జునకు వీరాభిమాని అయిన చందు నాగ్ ని పోలీస్ పాత్రలో చూపించనున్నాడట. అందుకు సంబంధించి చందు దగ్గర ఓ కథ సిద్ధంగా ఉందట. మరోవైపు మాస్ మహారాజ్ రవితేజ కోసం కూడా ఓ కథ వండుతున్నాడట ఈ యువ దర్శకుడు. రవితేజ శైలి వినోదం, యాక్షన్ ఉంటూనే దానికి కొంత సస్పెస్ జోడించి కథ రాసుకున్నాడట చందూ మొండేటి. వీరిలో ఒకరితో చందు సినిమా మొదలెట్టనున్నాడని ఫిల్మ్ నగర్ లో జోరుగా వార్తలు షికారు చేస్తున్నాయి. నాగ్ ‘నమో వెంకటేశాయ’ తర్వాత ‘రాజు గారి గది’ సీక్వెల్ చేయాల్సి ఉండటంతో చందు తొలుత రవితేజ సినిమానే సెట్స్ మీదికి తీసుకెళ్లే అవకాశం ఉంది.
