డైరెక్టర్ పూరి జగన్నాథ్, బుధవారం (అక్టోబర్ 26) హైదరాబాద్, జూబ్లీ హిల్స్ పోలీస్ స్టేషన్‌లో ఫైనాన్షియర్ శోభన్, డిస్ట్రిబ్యూటర్ వరంగల్ శ్రీనులపై కేసు పెట్టడం జరిగింది. విజయ్ దేవరకొండతో తీసిన ‘లైగర్’ సినిమా విషయంలో పూరికి, ఫైనాన్షియర్, డిస్ట్రిబ్యూటర్స్ అండ్ ఎగ్జిబిటర్స్‌కి మధ్య వివాదం నడుస్తోంది. కొద్దిరోజుల ముందు పూరి బయ్యర్లతో మాట్లాడిన ఆడియో లీక్ అవడం, అది వైరల్ అవడం తెలిసిందే. కట్ చేస్తే.. ఇప్పుడు వ్యవహారం కొత్త మలుపు తిరిగింది..
ఆడియో లీక్ తర్వాత ఏం జరిగిందో ఏమో తెలీదు కానీ పూరి సడెన్‌గా జూబ్లీ హిల్స్ పోలీస్ స్టేషన్‌లో ఫైనాన్షియర్ శోభన్, డిస్ట్రిబ్యూటర్ వరంగల్ శ్రీనులపై కేసు పెట్టాడు. వీళ్లిద్దరూ తనని బెదిరిస్తున్నారని పూరి కంప్లైంట్ చేశాడని తెలుస్తోంది. ఆడియో లీక్ పని కూడా వీరిద్దరిలో ఒకరిది అనే టాక్ వినిపిస్తోంది. పెద్ద సినిమాలకు ఫైనాన్స్ చేసే శోభన్ పూరి సినిమాకూ ఫైనాన్స్ చేశాడు. పూరి ఆడియో క్లిప్‌లో అతని గురించి కూడా చెప్పాడు. ఇక వరంగల్ శ్రీను నైజాం డిస్ట్రిబ్యూటర్.. ‘లైగర్’ ని నైజాంలో రిలీజ్ చేసింది అతనే.
అందరితో పాటు వీళ్లిద్దరు కూడా ‘లైగర్’ నష్టాలను తీర్చమని పూరిపై ఒత్తిడి తేవడంతో పాటు బెదిరింపులకు పాల్పడ్డారనేది పూరి వెర్షన్. విషయం తెలుసుకున్న టాలీవుడ్ ఫైనాన్షియర్లు ఇక ముందు పూరి సినిమాలకు ఫైనాన్స్ చేయకూడదంటూ అంతర్గత నిర్ణయం తీసుకున్నారని వార్తలు వినిపిస్తున్నాయి.. పూరి తనపై కేసు పెట్టడాన్ని తప్పుపట్టిన ఫైనాన్షియర్ శోభన్.. కొందరు మీడియా వారు సంప్రదించగా తన వెర్షన్ చెప్పాడట..
’’పూరిని అవసరమైనపుడు ఎలా ఆదుకున్నానో నాకు మాత్రమే తెలుసు..కేసులే కావాలంటే టాలీవుడ్ నిర్మాతల డీఫాల్ట్ చెక్కులు కట్టలు కట్టలు మా దగ్గర వున్నాయి.‘లైగర్’ విడుదలైన తర్వాత రోజు నుంచి ఫోన్ ఎత్తని వాళ్లని ఎలా బెదిరించగలం?.. సమాచారం ఇవ్వడం కూడా బెదిరింపేనా?.. అని చెప్పారని సమాచారం. ఇక వరంగల్ శ్రీను ఈ విషయంపై ఎలా స్పందిస్తాడో చూడాలి..
Home