AV… ఏదైనా సినిమా ప్రీ రిలీజ్ ఫంక్షన్ కానీ, ప్రమోషన్ ఈవెంట్ కానీ జరిగినప్పుడు వీటి హడావుడి మామూలుగా ఉండదు. గెస్ట్గా వచ్చినవాళ్లకు, సినిమాలో నటించిన వాళ్ల గురించి వివరిస్తూ.. ఆ ఏవీలో గొప్పగా చెబుతారు. ఒక్కోసారి ఆ AVలు చూసి గెస్ట్లు కూడా కళ్లు చెమరుస్తారు. అయితే అదే AV లేని పోని ఫ్యాన్ వార్కి కారణం అయితే… అస్సలు బాగోదు కదా. కానీ అదే జరిగేలా ఉంది. ‘మంగళవారం’ సినిమా టీమ్ చేసిన ఓ పని ఇప్పుడు పంచాయితీకి కారణమైంది.
అజయ్ భూపతి తెరకెక్కించిన ‘మంగళవారం’ సినిమా ప్రీ రిలీజ్ ఈవెంట్ ఇటీవల జరిగింది. ఆ సినిమా నిర్మాతతో తనకున్న స్నేహం కారణంగా అల్లు అర్జున్ ఆ ఈవెంట్కు ముఖ్య అతిథిగా విచ్చేశాడు. అయితే ఆ ఈవెంట్లో బన్నీని పొగడటానికి ‘మంగళవారం’ చేసిన పని ఇప్పుడు ఇబ్బందులకు గురి చేసింది. AVలో చూపించిన ఓ స్లైడ్లో సౌత్ ఇండియన్ హీరోల్లో ఇంత వరకు మేడం టుస్సాడ్లో ఎవరి విగ్రహం లేదన్నట్టుగా చెప్పారు. అంటే బన్నీనే ఫస్ట్ హీరో అన్నట్టుగా రాసుకొచ్చారు.
మేడం టుస్సాడ్లో సౌత్ సినీ పరిశ్రమ నుండి ఉన్న తొలి విగ్రహం ప్రభాస్ది. ఆ తరువాత మహేష్ బాబు విగ్రహాన్ని ఏర్పాటు చేశారు. ఈ విషయం ‘మంగళవారం’ టీమ్కి తెలియదా అంటూ సోషల్ మీడియాలో కామెంట్లు కనిపిస్తున్నాయి. అంతెందుకు ఈ విషయం బన్నీ పీఆర్ టీంకు తెలియదా? మంగళవారం (Mangalavaram) సినిమా బృందానికి తెలియదా? కావాలనే ఇలా చేస్తున్నారా? అంటూ నెటిజన్లు తప్పుపడుతున్నారు.
ఉన్న విషయాన్ని గొప్పగా చెప్పుకోవడం పీఆర్ టీమ్ పని. అయితే లేని విషయాన్ని ఇలా ఎక్కువ చేసి చూపించడం ఎందుకు, ఇంకొకరికి గొప్పగా నిలిచే అంశాన్ని హైజాక్ చేయడం ఎందుకు అనే ప్రశ్న వస్తోంది. గతంలో అభిమానులు ఇచ్చిన బిరుదు విషయంలోనూ బన్నీ పీఆర్ టీమ్ కాస్త అతి చేసిందనే ప్రచారం జరిగింది. ఆ తర్వాత బన్నీ చొరవతో సమసిపోయింది. ఇప్పుడు ఈ విషయంలో ఏం చేస్తారో చూడాలి.
మా ఊరి పొలిమేర 2 సినిమా రివ్యూ & రేటింగ్!
కీడా కోలా సినిమా రివ్యూ & రేటింగ్!
నరకాసుర సినిమా రివ్యూ & రేటింగ్!
