రామ్ పోతినేని, డైరెక్టర్ పూరి జగన్నాథ్(Puri Jagannadh) కాంబినేషన్లో ‘ఇస్మార్ట్ శంకర్’ వచ్చింది. పెద్ద హిట్ అయ్యింది. పూరీ ఈ సినిమాతో స్ట్రాంగ్ కంబ్యాక్ ఇచ్చాడు. ఆ తర్వాత ‘లైగర్’ వంటి పాన్ ఇండియా సినిమా చేయగలిగాడు. కానీ అది ఎపిక్ డిజాస్టర్ గా మిగిలింది. డిస్ట్రిబ్యూటర్లు భారీగా నష్టపోయారు. దీంతో ‘ఇస్మార్ట్ శంకర్’ కి సీక్వెల్ గా ‘డబుల్ ఇస్మార్ట్’ సినిమా చేయాల్సి వచ్చింది. అయితే బాక్సాఫీస్ వద్ద ఈ సినిమా కూడా పెద్ద డిజాస్టర్ గా మిగిలింది.
‘హనుమాన్’ తో భారీ లాభాలు ఆర్జించిన.. ‘ప్రైమ్ షో ఎంటర్టైన్మెంట్స్’ అధినేతలు అయిన నిరంజన్ రెడ్డి, ఆయన భార్య చైతన్య రెడ్డి ఈ చిత్రం ధియేట్రికల్ హక్కులు ఏకంగా రూ.50 కోట్లు పెట్టి కొనుగోలు చేశారు. కానీ డబుల్ ఇస్మార్ట్ డిజాస్టర్ టాక్ తెచ్చుకోవడంతో.. వారికి రూ.35 కోట్ల నుండీ రూ.40 కోట్ల వరకు నష్టం వాటిల్లింది. ఆ తర్వాత ఏం జరిగింది అనేది ఈరోజు వరకు ఎవ్వరికీ తెలీదు. ఇంకా వాస్తవం చెప్పాలంటే.. ఎవ్వరూ పట్టించుకోలేదు.
ఈ క్రమంలో చైతన్య రెడ్డి ఇటీవల మీడియా ముందుకు వచ్చింది. ‘డబుల్ ఇస్మార్ట్’ విషయంలో పూరీ, ఛార్మీ చేసిన మోసం గురించి బయటపెట్టింది. సినిమా రిలీజ్ కి ముందు.. ‘మా ప్రాణాలు మీ చేతుల్లోనే ఉన్నాయని, చచ్చిపోతామని’ ఎమోషనల్ బ్లాక్ మెయిల్ చేసిన పూరి, ఛార్మి..! సినిమా రిలీజ్ అయ్యి ఫ్లాప్ అయిన తర్వాత ముఖం చాటేశారని ఆమె ఆవేదన వ్యక్తం చేసింది. నష్టం వచ్చాక కనీసం ఫోన్ చేసినా స్పందించలేదని, నంబర్లు బ్లాక్ చేశారని, ఇంటికి వెళ్లినా లోపలికి రానివ్వకుండా దారుణంగా ప్రవర్తించారని’ చైతన్య వాపోయారు.
నిరంజన్ రెడ్డి నైతిక విలువలతో ఉండి ప్రతి చెక్కుపై సంతకాలు చేసి పేమెంట్లు ఇస్తే, తీరా కష్టకాలంలో మాత్రం వారు కనీస బాధ్యత వహించలేదని ఆరోపించారు చైతన్య రెడ్డి. కొంతమంది డిస్ట్రిబ్యూటర్ల ఒత్తిడి మేరకు.. ‘పోకిరి’ రీ రిలీజ్ చేసి కొంత రికవరీ చేద్దామని అనుకుంటే… ఆ టైమ్లో కూడా ఛార్మి పంపిణీదారులను ఇబ్బంది పెట్టిందట. ‘ఖర్చులన్నీ మీరు పెట్టుకుని, లాభాల్లో 70% వాటా ఇస్తే ఓకే’ అని నీచంగా మాట్లాడిందట ఛార్మీ.
ఇలాంటి పరిస్థితుల్లో ఛాంబర్ సైతం సాయం చేయలేదని చైతన్య రెడ్డి తెలిపింది. మరి చైతన్య రెడ్డి వ్యాఖ్యలపై పూరీ, ఛార్మీ ఎలా రియాక్ట్ అవుతారో చూడాలి.
