బాలీవుడ్ మోస్ట్ సక్సెస్ ఫుల్ ఫ్రాంచైజ్ లో “హౌస్ ఫుల్” ఒకటి. ఇప్పటివరకు వచ్చిన 4 సినిమాలు సూపర్ హిట్ అయ్యాయి, దాంతో 5వ పార్ట్ ను రిలీజ్ చేశారు. ఈ సినిమాకి రావాల్సినంత హైప్ రాకపోవడంతో.. ఈ సినిమాకి రెండు క్లైమాక్స్ ను డిజైన్ చేసి.. హౌస్ ఫుల్ 5A, 5B అంటూ రెండు రకాల క్లైమాక్స్ లను థియేటర్లలో రిలీజ్ చేసారు. ఈ క్రమంలో.. ఈ సినిమాపై ఆసక్తి పెరిగింది. మరి సినిమా ఎలా ఉంది? ఫ్రాంచైజ్ స్థాయిలో హిట్ అయ్యిందా లేదా? అనేది చూద్దాం..!!
కథ: 69 బిలియన్ పౌండ్ల ఆస్తిపరుడు రంజీత్ అకాల మరణంతో.. అతడి ఆస్తి కొట్టేయడం కోసం అతని కొడుకుగా ఎంట్రీ ఇస్తారు జూలియస్ (అక్షయ్ కుమార్), జలాబుద్దీన్ (రితేష్ దేశ్ ముఖ్), జల్ భూషన్ (అభిషేక్ బచ్చన్).
ఈ ముగ్గురిలో అసలు జాలీ ఎవరు? ఆస్తి కోసం ఈ ముగ్గురు చేసిన హంగామా ఏమిటి? ఈ ముగ్గురు కాకుండా ఆస్తి కోసం వెంపర్లాడుతున్న మరొకరు ఎవరు? అనేది “హౌస్ ఫుల్ 5” కథాంశం.
నటీనటుల పనితీరు: ఈ సినిమాలో ఒకరు బాగా నటించారు, మరొకరు నటించలేదు అని చెప్పడానికి లేకుండా.. అందరూ ఓవర్ యాక్షన్ తో చిరాకు పుట్టించారు.
హీరోయిన్లైతే కేవలం అంగాంగ ప్రదర్శన కోసం మాత్రమే ఉన్నారు. సినిమాలో కనిపించే ప్రతి ఒక్క అమ్మాయికి ప్రతి ఫ్రేములో కుదిరితే యద లేకపోతే పిరుదుల దగ్గర టైట్ క్లోజ్ పెట్టి దర్శకనిర్మాతలు తమ పైత్యాన్ని ఘనంగా చాటుకున్నారు.
ఇక మిగతా పాత్రధారులు చేసే బీ గ్రేడ్ కామెడీ గురించి ఎంత తక్కువ మాట్లాడుకుంటే.. అంత మంచిది.
సాంకేతికవర్గం పనితీరు: సినిమాలో బీ గ్రేడ్ జోక్స్ ఉండడం, శృంగారపరంగా ప్రేరేపితంగా సంభాషణలు ఉండడం అనేది ఇదివరకు “గ్రాండ్ మస్తీ, మస్త్ రామ్, హంటర్” వంటి సినిమాల్లో చూసాం. కానీ.. మొదటిసారి బిలో ది బెల్ట్ కామెడీ అసహ్యం పుట్టించింది. అక్షయ్ కుమార్, అభిషేక్ బచ్చన్ లాంటి ఫ్యామిలీ ఫాలోయింగ్ ఉన్న హీరోలు ఇంత దిగజారుడు కామెడీ చేయడం అనేది బాధాకరం. ఇందుకు దర్శకుడు తరుణ్, కథ-స్క్రీన్ ప్లే అందించిన నిర్మాత సాజిద్ నడియాడ్ వాలాలను నిందించాలి.
అయితే.. టెక్నికల్ గా మాత్రం మేకింగ్ విషయంలో అస్సలు రాజీపడలేదు మేకర్స్. సీజీ & బ్లూ మ్యాట్ షాట్స్ ను చాలా జాగ్రత్తగా భారీగా ఖర్చు చేశారు. ఆర్ట్ వర్క్ & ప్రొడక్షన్ డిజైన్ టీమ్ కూడా ఎక్కడా కాంప్రమైజ్ అవ్వలేదు.
అయితే.. టెక్నికల్ గా ఎంత స్ట్రాంగ్ గా ఉన్నప్పటికీ.. నీచమైన డబుల్ మీనింగ్ డైలాగ్స్ & బీ గ్రేడ్ కంటే బీలో లెవల్ కామెడీ కారణంగా టెక్నీషియన్స్ వర్క్ ఏదీ ఎలివేట్ అవ్వలేదు.
విశ్లేషణ: “గ్రాండ్ మస్తీ, గ్రేట్ గ్రాండ్ మస్తీ” లాంటి బీ గ్రేడ్ సినిమాలు చూస్తున్నప్పుడు ఎక్కడా అసహ్యం కలగదు. ఎందుకంటే.. ఆ తరహా సినిమా నుంచి ఏం ఊహిస్తామో అదే అందిస్తుంది ఆ చిత్రం. అయితే “హౌస్ ఫుల్” ఫ్రాంచైజ్ వేరు. ఇది స్లాప్ స్టిక్ కామెడీ, ఫ్యామిలీ ఆడియన్స్ లో ఈ సినిమాకి మంచి ఫాలోయింగ్ ఉంది. అలాంటప్పుడు సంబంధం లేని కేటగిరి జోకులను, ఎక్స్ పోజింగులను ఇరికించకూడదు. ఆ ఇరికించడం కారణంగా “హౌస్ ఫుల్ 5” కనీస స్థాయిలో ఆకట్టుకోలేకపోయింది. ఇక సినిమాకి రెండు క్లైమాక్సులు అంటూ బృందం తెగ హడావుడి చేసింది కదా, 5A & 5B కి మధ్య తేడా ఏంటంటే.. 5Aలో ఫర్దీన్ ఖాన్ & అభిషేక్ బచ్చన్ లు విలన్ లు కాగా, 5Bలో చిత్రాంగద సింగ్ & అభిషేక్ బచ్చన్ లు విలన్లు. ఈ మాత్రం దానికోసం ఈ సినిమాని 5A ఒకసారి, 5B ఒకసారి చూడాల్సిన అవసరం ఏమాత్రం లేదు.
ఫోకస్ పాయింట్: ‘బీ గ్రేడ్’ కంటెంట్ తో ‘హౌస్ ఫుల్’ అవ్వడం చాలా కష్టం!
రేటింగ్: 1/5
Home