యువతకి నచ్చేలా సినిమా తీస్తే చాలు.. దాన్ని విజయవంతం ఎలా చేయాలో వారికి తెలుసు. స్టార్ హీరో అవసరంలేదు… స్టార్ డైరక్టర్ తో పని లేదు. టికెట్ ఖర్చుకు వినోదం అందితే చాలు.. హిట్ గ్యారంటీ అని ఆర్ఎక్స్ 100 మూవీ నిరూపించింది. నూతన నటుడు కార్తికేయ హీరోగా యువ దర్శకుడు అజయ్ భూపతి తెరకెక్కించిన ఈ సినిమా గురించే ఇప్పుడు అందరూ మాట్లాడుకుంటున్నారు. కూర్చోపెట్టే కథ, హీరోయిన్ పాయల్ రాజ్‌పుత్ అందాలు సినిమాకి రిపీట్ ఆడియన్స్ వచ్చేలా చేస్తోంది. రెండున్నర కోట్లతో నిర్మించబడిన ఈ సినిమా రెండు రోజుల్లోనే 2.53 కోట్ల షేర్ వసూలు చేసి ఔరా అనిపించింది.
మౌత్ టాక్ కారణంగా థియేటర్లన్నీ హౌస్ ఫుల్ కలక్షన్స్ తో సాగుతున్నాయి. అందుకే టీవీ ఛానల్స్ వారు ఈ సినిమా శాటిలైట్ రైట్స్ కొనుగోలు చేయడానికి పోటీపడుతున్నారు. సినిమా బడ్జెట్ కంటే డబల్ ఇస్తామన్నా నిర్మాత అశోక్ రెడ్డి గుమ్మకొండ ఇవ్వడానికి ఒప్పుకోవడం లేదని ఫిలిం నగర్ వాసులు చెప్పారు. తాజాగా ఓ ఛానల్ ఆరు కోట్లకు అడిగినట్లు తెలిసింది. ఇంకొంతకాలం ఆగితే ఇంకొంచెం రేట్ పెరుగుతుందని నిర్మాత భావిస్తున్నారు. ఆరున్నర కోట్లకు అమ్ముడుపోయే అవకాశం కనిపిస్తోంది. ఏమైనా ఈ ఏడాది సంచలన విజయం సాధించిన చిత్ర జాబితాల్లో ఆర్ఎక్స్ 100 మూవీ చేరిపోయింది.
Home