ఇప్పుడు హారర్‌ సినిమాలు మనకు కామన్‌ అయిపోయాయి. వాటికి కాస్త కామెడీ యాడ్‌ చేసి కామెడీ – హారర్‌ అని మరో కొత్త (?) జోనర్‌ క్రియేట్‌ చేశారు కూడా. కానీ నికార్సైన తొలి హారర్‌ సినిమా వచ్చి మన దేశంలో 75 ఏళ్లు అయిపోయింది. ఆ సినిమానే ‘మహల్’. ఓసారి ఆ సినిమా గురించి కూడా చూద్దాం. ఇండియన్‌ సినిమా చరిత్రలో హారర్‌ జానర్‌లో వచ్చిన తొలి మూవీనే ‘మహల్’ (Mahal) . అక్టోబర్ 13, 1949న వచ్చిన ఈ సినిమాను కమల్ ఆమ్రోహి తెరకెక్కించారు.
పునర్జన్మ నేపథ్యంలో సాగే ఈ సినిమా ఇది. హరి శంకర్ (అశోక్ కుమార్) (Ashok Kumar) అనే అరిస్టోక్రాట్ తనకు వారసత్వంగా వచ్చిన పురాతన మహల్‌లో కుటుంబంతో కలిసి నివసిస్తుంటాడు. అప్పుడు కామిని (మధుబాల) (Madhubala) అనే వింత మహిళను కలుసుకుంటాడు. గత జన్మలో తామిద్దరం ప్రేమికులని కామిని చెబుతుంది. కామిని చెప్పేది నిజమేనా? గత జన్మలో ఏం జరిగింది? మహల్‌లోనే కామిని ఎందుకు ఉండిపోవాల్సి వచ్చింది? అనేది మిగతా కథ.
అశోక్ కుమార్, మధుబాల ప్రధాన పాత్రల్లో నటించిన ఈ సినిమా ఆ రోజుల్లో భారీ బడ్జెట్‌తో తెరకెక్కింది. అప్పట్లోనే ఈ సినిమాకు రూ. 12 నుంచి రూ. 13 లక్షలు ఖర్చు చేశారని అంటారు. అంటే ఇప్పుడది అన్నే కోట్లలో ఉంటుంది. హారర్‌ సినిమాలో మామూలుగా హైలైట్‌గా నిలిచే పాయింట్‌ బ్యాగ్రౌండ్‌ మ్యూజిక్‌. ఈ సినిమాకు ఆ సంగీతం ప్రాణం పెట్టింది. దానికితోడు ‘ఆయేగా ఆనేవాలా’ అనే పాట ఒకటి.
లతా మంగేష్కర్ గాత్రంతో రూపొందిన ఈ పాట లిరిక్సే, ఆమె వాయిస్‌ మాడ్యులేషన్‌ భయంకరంగా ఉంటాయి అని చెప్పొచ్చు. ఈ సినిమా ఆ రోజుల్లోనే రూ.25 లక్షలకు పైగా వసూళ్లను సాధించింది. ఇప్పటి లెక్కల్లో ఓ 25 కోట్ల రూపాయలు అని చెప్పొచ్చు. అంటే పెట్టిన డబ్బులకు డబుల్‌ వచ్చాయన్నమాట. డబ్బులు సంగతి అటుంచితే ప్రేక్షలకు భయమైతే టన్నులు టన్నులు వచ్చింది. ఇంకా ఆ భయం కలిగిస్తూనే ఉంది.
