Lagaan: రిజెక్ట్‌ చేసిన కథను మళ్లీ విని.. ఆఖరికి డబ్బులు పెట్టి.. 25 ఏళ్ల ‘లగాన్‌’ వెనుక ఇంత జరిగిందా?

June 15, 2026 / 03:36 PM ISTByFilmy Focus Desk

Join Us

కొన్ని సినిమాలు ‘తరానికొకటి’ అని చెప్పుకునే గౌరవాన్ని సంపాదించుకుంటాయి. అలాంటి సినిమాలు ఎన్నేళ్ల తర్వాత చూసినా, గుర్తు చేసుకున్నా మనసుకు తెలియని ఆనందాన్నిస్తాయి. అలాంటి వాటిలో ఒకటి ‘లగాన్‌’. ఈ సినిమా వచ్చి 25 ఏళ్లు అయిపోయింది అంటే ఎవరూ నమ్మకపోవచ్చు. కానీ ఇది నిజం. ఆమిర్‌ ఖాన్‌ – అశుతోష్‌ గొవారికర్‌ ఈ దేశానికి అందించిన ఆణిముత్యం వచ్చి 25 ఏళ్లు అయిపోయింది. ఈ సందర్భంగా సినిమా గురించి కొన్ని ఆసక్తికర విషయాలు తెలుసుకుందాం.

Lagaan

* 2001 జూన్‌ 15న విడుదలైన ఈ సినిమా ఆస్కార్‌ పురస్కారం బరిలో మన దేశం తరఫున నిలిచి ప్రపంచం దృష్టిని ఆకర్షించింది.
* ప్రముఖ బాలీవుడ్‌ కథానాయకుడు ఆమిర్‌ ఖాన్‌ కెరీర్‌లోనే కాదు.. ఇండియన్‌ సినీ చరిత్రలోనే ఓ మైలురాయి ‘లగాన్‌’. దేశభక్తిని రగిలించే కథకు, క్రికెట్ నేపథ్యం యాడ్‌ చేసి మరపురాని చిత్రంగా మార్చారు.
* ఆమిర్‌ ఖాన్‌ నిర్మాతగా మారి నిర్మించిన తొలి చిత్రమిది. దానికి కారణం ఈ సినిమాను నిర్మించడానికి ఏ నిర్మాతా ముందుకు రాకపోవడమే.
* గుజరాత్‌లోని కచ్‌ సమీపంలో భుజ్‌ ప్రాంతంలో చంపానేర్‌ అనే గ్రామాన్ని సినిమా కోసం సృష్టించారు.
* తొలుత ఈ కథ షారుఖ్‌ ఖాన్‌, హృతిక్‌ రోషన్‌, అభిషేక్‌ బచ్చన్‌ వద్దకు వెళ్లింది. ఆఖరికి ఆమిర్ ఖాన్‌ హీరో అయ్యాడు.
* అశుతోష్‌ గొవారికర్‌ ఈ కథ చెప్పినప్పుడు ఆమిర్‌ ఓకే చేయలేదట. ఆ తర్వాత సెకండ్‌ సిట్టింగ్‌లో విని కన్నీరు పెట్టేసుకుని ఓకే చెప్పారట.

* నిర్మాతను వెతికే క్రమంలో చాలా మంది నో చెప్పడంతో ఆఖరికి తానే ముందుకొచ్చి సినిమాను నిర్మించారు ఆమిర్‌.
* ఈ సినిమాలో గ్రామస్థులుగా నటించిన వారిలో ఎక్కువ మందికి క్రికెట్‌ అంటే అవగాహన కూడా లేదు. చిత్రీకరణకు ముందు వారికి క్రికెట్‌లో మెళకువలు నేర్పించారు.
* ఇండియా టీమ్‌ బౌండరీలు బాదినప్పుడు, వికెట్లు తీసినప్పుడు ప్రేక్షకుల్లా సందడి చేయడానికి దగ్గర గ్రామాలకు వెళ్లి లొకేషన్‌కి పిలిచి.. 10 వేల మందితో ఆ సీన్స్‌ తీశారట.
* ఈ సినిమా నిడివి తొలుత ఏడున్నర గంటలు. ఆ తర్వాత దాన్ని 3. 44 గంటలకు ఎడిట్‌ చేశారు. ఈ సినిమాకు ఎనిమిది జాతీయ పురస్కారాలు వచ్చాయి.

అలా దేశానికే కాదు ప్రపంచానికే ఓ మధురానుభూతిని అందించాడు ఆమిర్‌. దానికి కారణమయ్యారు దర్శకుడు అశుతోష్‌ గొవారికర్‌. మిగిలిన వారి ప్రమేయం లేదు అనుకునేరు. వారు కూడా సినిమాలో భాగమే. విజయంలో భాగమే. ఆఖరికి ఆ ప్రయోగాన్ని ఆదరించిన మీరు కూడా. అదేనండీ ప్రేక్షకులు కూడా.