ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు.. స్టార్‌ హీరో తారక్‌ (Jr NTR) మధ్య ఆల్‌ ఓకేనా అంటే.. కాదు అనే అంటారు. వ్యక్తిగత కారణాలు, కుటుంబ కారణాల సంగతి మనకు తెలియదు కానీ.. రాజకీయ కారణాలు మాత్రం చాలానే ఉన్నాయి అని అంటుంటారు. ఏపీలో గత వైసీపీ ప్రభుత్వం చేసిన కొన్ని పనులు.. వాటికి తారక్‌ నుండి ఎలాంటి ఖండన లేకపోవడం లాంటి కారణాల వల్ల ఇద్దరి మధ్య, ఇరు కుటుంబాల మధ్య దూరం ఏర్పడిందని సమాచారం. అయితే ఇటీవల ప్యాచప్‌ అయింది అంటున్నారు కానీ క్లారిటీ లేదు.
ఇప్పుడు ఈ చర్చంతా ఎందుకు అంటే.. మన దగ్గర దాదాపు అందరికీ తెలిసిన విషయం బాలీవుడ్‌ జనాలకు తెలియదు. దీనికి తాజా ఉదాహరణ కపిల్‌ శర్మ షోలో జరిగిన చిన్నపాటి కామెడీనే. ‘దేవర’ (Devara) సినిమా ప్రచారం కోసం ఇటీవల తారక్‌ ఆ షోకి వెళ్లాడు. నెట్‌ఫ్లిక్స్‌లో టెలీకాస్ట్‌ అవుతున్న షోలో తారక్‌ గురించి మాట్లాడుతూ ‘మీకు ఆంధ్రప్రదేశ్‌ ముఖ్యమంత్రి బంధువు అట కదా’ అని అడిగారు. దానికి తారక్‌ అవును అని అన్నాడు కూడా.
అయితే, ఆ తర్వాత కపిల్‌ ఇద్దరి బంధం మీద ఓ జోకేశాడు. ‘మీ దగ్గరకు ఓ రచయిత వచ్చి కథ చెప్పాక.. నచ్చకపోతే ఆయన అదే మాట చెబుతారు కదా. దానికి వెంటనే ఆ రచయిత ‘నాదొక కాంట్రాక్ట్‌ ఉంది.. కాస్త సీఎంతో మాట్లాడతారా అని అడిగితే ఏం చేస్తారు’ అని అంటే మీరేమంటారు? అంటూ ఓ పొలిటికల్‌ జోక్‌ వేశాడు కపిల్‌ శర్మ. దానికి తారక్‌ కాస్త ఇబ్బందిగానే తలూపేసి కూర్చున్నాడు.
మామూలుగా అయితే దానికి ఏదో ఒక సమాధానం వచ్చేది. కానీ ఏమంటే ఏమవుతుందో? ఏం చెప్పాల్సి వస్తుందో అని తారక్‌ కామ్‌గా ఉన్నట్లు అర్థమవుతోంది. దీంతో కపిల్‌కి తెలియదు కదా.. ఏపీలో తారక్‌ – చంద్రబాబు మధ్య అంత సీన్‌ లేదు అని సోషల్ మీడియాలో కామెంట్స్‌ కనిపిస్తున్నాయి. చూద్దాం కపిల్‌ మాట నిజమై ఇరు కుటుంబాలు తిరిగి దగ్గరవుతాయేమో.
