ఆపకుండా డైలాగ్ చెప్పాను అంటే అది ఎన్టీఆర్ వలనే : సంపూర్ణేష్ బాబు

టాలీవుడ్ లో స్పూఫ్ తరహా సినిమాలు చేస్తూ వార్తల్లో ఉంటుంటాడు సంపూర్ణేష్ బాబు. ఈయన్ని బర్నింగ్ స్టార్ అని కూడా పిలుస్తుంటారు. తన బాడీ లాంగ్వేజ్ తో అలాగే డైలాగ్ డెలివరీ ప్రేక్షకులకు కితకితలు పెడుతుంటాయి. ‘హృదయ కాలేయం’ ‘సింగం 123’ వంటి చిత్రాలతో మంచి ఫలితాల్ని అందుకున్నాడు. ఇప్పుడు ‘కొబ్బరిమట్ట’ అనే చిత్రంతో ప్రేక్షకుల ముందుకు రావడానికి సిద్దమవుతున్నాడు. ఆగష్టు 10న ఈ చిత్రం విడుదల కాబోతుంది. ఇక ప్రమోషన్లలో భాగంగా.. ఈ చిత్రంలో ఏకధాటిగా ఆయన 3 నిమిషాల పాటు చెప్పిన డైలాగ్ ను విడుదల చేసారు చిత్ర యూనిట్ సభ్యులు. సింగల్ టేక్ లో ఈ డైలాగ్ చెప్పాడట సంపూర్ణేష్ బాబు. ప్రస్తుతం ఈ డైలాగ్ సోషల్ మీడియాలో వైరల్ అవుతోంది.

తాజాగా ఓ ఇంటర్వ్యూలో సంపూ ఈ డైలాగ్ గురించి మాట్లాడుతూ .. “ఈ సినిమాలో 3 నిమిషాల పాటు ఆపకుండా నేను చెప్పవలసిన డైలాగ్స్ గురించి దర్శకుడు నాతో ప్రస్తావించాడు. ఒక రోజున నాకు ‘యమదొంగ’ సినిమాలో ఎన్టీఆర్ యమధర్మరాజుగా చెప్పిన డైలాగ్స్ ను చూపించాడు. ఎన్టీఆర్ ఆ డైలాగ్స్ ను ఎంత ఎనర్జీతో చెప్పారో అలా చెప్పాలని అన్నాడు. ఎన్టీఆర్ మాదిరిగా ఎంత ఎనర్జీతో ఆ డైలాగ్స్ ను చెప్పడం మొదలుపెడతావో, అంతే ఎనర్జీతో పూర్తిచేయాలని చెప్పాడు. ఎన్టీఆర్ ను స్ఫూర్తిగా తీసుకునే ఆ డైలాగ్ చెప్పాను. అందుకోసం నేను గట్టి కసరత్తు చేయవలసి వచ్చింది” అంటూ చెప్పుకొచ్చాడు.