సూపర్ స్టార్ కి జోడీగా నటించనున్న కాజల్ అగర్వాల్!

ప్రస్తుతం కాజల్ అగార్వల్ ఆనందంతో ఉక్కిరిబిక్కిరి అవుతోంది. ఇప్పటి వరకు ఆమె తెలుగు యువహీరోలతో అనేక బ్లాక్ బస్టర్ హిట్స్ అందుకుంది. మెగాస్టార్ చిరంజీవి సరసన కూడా నటించి సూపర్ హిట్ సొంతం చేసుకుంది. తమిళంలోనూ అజిత్, విజయ్, విశాల్, ధనుష్, జీవా వంటి  హీరోలతో ఆమె నటించి ఎన్నోవిజయాలను కైవశం చేసుకుంది. ఆ సందర్భాల్లో కంటే ఇప్పుడు ఎక్కువగా ఆనందపడుతోంది. అందుకు కారణం సూపర్ స్టార్ రజినీకాంత్ సరసన నటించే అవకాశం రావడమే. కాజల్ సినీ పరిశ్రమలో అడుగుపెట్టినప్పటి నుంచి రజినీకాంత్ తో నటించాలని కలలు కంది. అతను రాజకీయంలోకి వెళ్తున్న వార్త తెలిసి తన కల కలగానే మిగిలిపోతుందని బాధపడింది. కానీ రాజకీయంలోకి పూర్తిగా అడుగుపెట్టబోయే ముందు సూపర్ స్టార్ కార్తీక్ సుబ్బరాజ్ దర్శకత్వంలో ఒక సినిమా చేస్తున్నారు.

ఈ సినిమాలో హీరోయిన్ గా అనేకమందిని అనుకున్నారు. చివరకు కాజల్ అగర్వాల్ ని సెలక్ట్ చేశారు. రజినీకాంత్ కి జోడీగా అనగానే కథ కూడా వినకుండా కాజల్ సంతకం చేసినట్లు తెలిసింది.ఈ సినిమా గురించి అధికారిక ప్రకటన త్వరలోనే వెలువడనుంది. ప్రస్తుతం కాజల్ క్వీన్ రీమేక్ లో నటిస్తోంది. మరో రెండు ప్రాజక్ట్స్ ఆమె చేతిలో ఉన్నాయి. ఎంతోమంది కొత్త హీరోయిన్స్ పోటీని తట్టుకొని ఛాన్స్ అందుకుంటున్న కాజల్ ని అభినందించక ఉండలేము.