మెగాస్టార్ చిరంజీవి కెరీర్ లో మంచి హిట్ సాధించిన సినిమాలో విజేత ఒకటి. అదే పేరుతో అతని చిన్నల్లుడు కళ్యాణ్ దేవ్ హీరోగా ఎంట్రీ ఇచ్చి విజేతగా నిలిచారు. రాకేష్ శశి దర్శకత్వంలో తెరకెక్కిన ఈ మూవీ గతవారం రిలీజ్ అయి మంచి విజయాన్ని సాధించింది. అలాగే మంచి నటుడిగా కళ్యాణ్ దేవ్ పేరు తెచ్చుకున్నారు. ఈ సినిమా ప్రమోషన్ కార్యక్రమాల్లో చిరంజీవి, రామ్ చరణ్ తేజ్, అల్లు అర్జున్ పాల్గొన్నారు. కళ్యాణ్ దేవ్ నటనని అభినందించారు. అయితే పవర్స్టార్ పవన్ కళ్యాణ్ మాత్రం ఈ సినిమాకు సంబంధించి ఎలాంటి కార్యక్రమంలోనూ పాల్గొనలేదు. ఇదే విషయాన్ని కళ్యాణ్ దేవ్ ముందు ఉంచగా అతను ఇలా స్పందించారు.
“పవన్ కళ్యాణ్ ప్రస్తుతం రాజకీయాలతో బిజీగా ఉన్నారు. అందుకే మేము ఆయనను కలవలేదు. బిజీగా ఉన్న సమయంలో వెళ్లి మా సినిమా కోసం ఆయణ్ని డిస్ట్రబ్ చేయాలనుకోలేదు. పవన్ మా సినిమా ప్రమోషన్ కార్యక్రమాలకు రాలేకపోయినా.. ఆయన ఆశీస్సులు మా సినిమాకు తప్పకుండా ఉంటాయి” అని కళ్యాణ్ చెప్పారు. తొలిసినిమా హిట్ కావడంతో మాలి సినిమా సూపర్ హిట్ కావాలని భావిస్తున్నారు. అందుకే కళ్యాణ్ మాస్ మసాలా కథని ఎంచుకున్నారు. స్టార్ డైరక్టెర్ దర్శకత్వంలో నటించబోతున్నట్లు తెలిసింది. త్వరలోనే ఆ సినిమా గురించి వివరాలు బయటికి రానున్నాయి.
