Kiara Advani weds Sidharth: కియారా – సిద్ధార్థ్‌ పెళ్లి ఫొటోలు వైరల్‌.. మీరు చూశారా?

బాలీవుడ్‌లో మరో ప్రేమ జంట ఒక్కటైంది. గత కొన్ని రోజులుగా అధికారికంగా సమాచారం లేకపోయినా, పుకార్లు వినిపిస్తున్న కియారా అడ్వాణీ – సిద్ధార్థ్‌ మల్హోత్రా పెళ్లి జరిగిపోయింది. తొలుత ఆరో తేదీ జరుగుతుంది అని చెప్పిన పెళ్లి.. ఆఖరికి ఏడో తేదీ జరిగింది. ఈ మేరకు కొత్త జంట తమ సోషల్‌ మీడియా హ్యాండిల్స్‌లో పెళ్లి ఫొటోలను షేర్‌ చేసింది. వాటిని చూసి అభిమానులు, సెలబ్రిటీలు వారికి అభినందనలు, శుభాకాంక్షలు తెలియజేస్తున్నారు.

‘అలాంటిదేమీ లేదు. మేం మంచి స్నేహితులం మాత్రమే’ అంటూ చాలా కాలంగా చెబుతూ వచ్చారు కియారా – సిద్ధార్థ్‌. ‘షేర్షా’ చిత్రంలో నటించడంతో వీరి మధ్య పరిచయమైంది. ఆ తర్వాత చాలా కాలం ప్రేమించుకుని ఇప్పుడు ఒక్కటయ్యారు. కుటుంబ సభ్యులు, కొద్దిమంది అతిథుల సమక్షంలో కియారా – సిద్ధార్థ్‌ పరిణయం మంగళవారం రాత్రి ఘనంగా జరిగింది. రాజస్థాన్‌ జైసల్మేర్‌లోని సూర్యఘర్‌ ప్యాలస్‌లో ఈ వేడుక జరిగింది. కరణ్‌ జోహార్‌, షాహిద్‌ కపూర్‌, అర్మాన్‌ జైన్‌, జూహీ చావ్లా తదితరులు హాజరయ్యారని సమాచారం.

ఈ నెల 5, 6 తేదీల్లో ప్రీ వెడ్డింగ్‌ వేడుకలు జరిగాయి. హిందూ సంప్రదాయం ప్రకారం జరిగిన ఈ వేడుకలో వివిధ దేశాలకు చెందిన వంటకాలను వడ్డించారని సమాచారం. ఫొటోలు / వీడియోలు తీయకుండా కియారా సిద్ధార్థ్‌ ముందుగానే రిక్వెస్ట్‌ చేసిన విషయం తెలిసిందే. సినీ తారలు, స్నేహితుల కోసం ముంబయిలో రిసెప్షన్‌ ఏర్పాటు చేస్తారని సమాచారం. మెహందీ, హల్దీ, సంగీత్ కార్యక్రమాలు ఘనంగా నిర్వహించారు. మెహిందీలో కియారా- సిద్ధార్థ్‌ కలసి ‘కాలా చష్మా..’, ‘బిజిలీ…’, ‘నాచ్నే దే సారే…’ పాటలకు డ్యాన్స్‌ వేశారట.

కియారా మెహందీ ఫంక్షన్‌లో ఆర్టిస్ట్ వీణా నగ్దా మెహిందీ డిజైన్స్ ప్రత్యేక ఆకర్షణగా నిలిచాయంటున్నారు. ఈ పెళ్లికి రూ. కోట్లు ఖర్చు చేసినట్లు సమాచారం. ముంబయికి చెందిన ఓ వెడ్డింగ్ ప్లానింగ్ కంపెనీ ఆధ్వర్యంలో ఈ పెళ్లి ఘనంగా నిర్వహించారట. వీరి పెళ్లికి ఒక రోజుకు రూ.2 కోట్లు ఖర్చు చేస్తున్నట్లు సమాచారం. ఇక పెళ్లి డ్రెస్‌లు, వంటలు తదితర లెక్కలు త్వరలోనే తెలిసే అవకాశం ఉంది.

రైటర్‌ పద్మభూషణ్‌ సినిమా రివ్యూ & రేటింగ్!
రెబల్స్ ఆఫ్ తుపాకుల గూడెం సినిమా రివ్యూ & రేటింగ్!

మైఖేల్ సినిమా రివ్యూ & రేటింగ్!
టాలీవుడ్ లో రీమిక్స్ చేసిన 20 తెలుగు పాటలు ఇవే!