తమిళ నటుడు సూర్య గజని, 24 చిత్రాల్లో అద్భుతమైన నటనను ప్రదర్శించారు. అతను చేసిన సినిమాలన్నీ నటనకు ప్రాధాన్యం ఉన్న సినిమాలే. అందుకే సూర్య తెలుగు వారికి సైతం అభిమాన హీరో అయ్యారు. అటువంటి స్టార్ హీరోపై ఓ ఛానెల్ ప్రసారం చేసిన కార్యక్రమం ఇప్పుడు వివాదాస్పదమైంది. టీవీ యాంకర్స్ సూర్య ఎత్తుపై చేసిన కామెంట్స్ అభిమానుల ఆగ్రహానికి కారణమైంది. ప్రముఖ టీవీ ఛానల్ సన్‌ నెట్‌వర్క్‌లో ప్రసారమైన కార్యక్రమంలో సూర్య ఎత్తు గురించి చులకన చేయడంతో ఆ ఛానల్ తీరును ఖండిస్తూ తమిళనాడులో సూర్య అభిమానులు ఆందోళన కొనసాగిస్తున్నారు.
సూర్య అభిమానులకు తమిళ నటీనటులు అనేక మంది మద్దతు పలుకుతున్నారు. తాజాగా కుష్బూ ఈ విషయంపై స్పందించారు. “నటనకు ఎత్తుకు ఎటువంటి సంబంధం లేదు. అసలు ఎత్తుతో అవసరం లేదు. నటుడు సూర్యపై అలాంటి కామెంట్స్ చేయడం తప్పు. ” అని కుష్బూ ట్వీట్ చేశారు. ఇందుకోసం సంబంధిత టీవీ ఛానల్ క్షమాపణ చెప్పాలని డిమాండ్‌ చేశారు. భవిష్యత్‌లో సినీ కళాకారులపై అనుచిత వ్యాఖ్యలు చేయరాదని, ముఖ్యంగా టీవీ ఛానళ్లలో కథనాలను ప్రసారం చేయడం ఇంతటితో సరిపెట్టుకోవాలని కుష్బూ తన అభిప్రాయాన్ని వ్యక్తం చేశారు.
Home