మలయాళం సూపర్ హిట్ రీమేక్ లో మాధవన్..!

నిన్నమొన్నటివరకూ అసలు మలయాళ పరిశ్రమకు చాలా తక్కువగా చూసిన తెలుగు చిత్ర పరిశ్రమ మాత్రమే కాకుండా హిందీ మరియు తమిళ చిత్ర పరిశ్రమలు కూడా ఇప్పుడు మలయాళం ఇండస్ట్రీని ఫ్లాలో అవుతున్నాయి. ప్రస్తుతం నాగచైతన్య “ప్రేమమ్” చిత్రాన్ని అదే పేరుతో రీమేక్ చేస్తుండగా.. ఇటీవల విడుదలైన “కమ్మటిపాదం” అనే చిత్రాన్ని కూడా తెలుగులో ఓ యువ కథానాయకుడితో రీమేక్ చేసేందుకు సన్నాహాలు జరుగుతున్నాయి. తాజాగా మరో మలయాళ చిత్రాన్ని రీమేక్ చేసేందుకు సన్నద్ధమవుతున్నారు తమిళ దర్శకనిర్మాతలు.

మలయాళంలో దుల్కర్ సల్మాన్ హీరోగా నటించగా ఘన విజయం సాధించిన “చార్లీ” చిత్రాన్ని అదే పేరుతో తమిళంలో రీమేక్ చేయనున్నారట. ఈ రీమేక్ లో మాధవన్ కథానాయకుడిగా నటిస్తాడని తెలుస్తోంది. తమిళంతోపాటు తెలుగులోనూ ఈ చిత్రాన్ని రీమేక్ చేయాలా లేక డబ్బింగ్ చేస్తే సరిపోతుందా? అని ప్రస్తుతం నిర్మాణ బృందం తర్జనభర్జనలు పడుతోంది. తమిళంతో పాటు బెంగాలీ, మరాఠీ లో కూడా ఈ చిత్రం రీమేక్ కానుండగా.. నవంబర్ నుంచి ఈ చిత్రం సెట్స్ పైకి వెళ్లనుంది. ఈ సూపర్ హిట్ రీమేక్ కు ఎవరు దర్శకత్వం వహిస్తారు, ఎవరు నిర్మిస్తారు అనే విషయాలు తెలియాల్సి ఉంది!