సూపర్ స్టార్ 23వ చిత్రం రిలీజ్ తేదీల్లో మార్పు

సూపర్ స్టార్ మహేష్ బాబు ప్రతి చిత్రాన్ని తన మొదటి సినిమా చేస్తున్నట్లు కష్టపడతారు. అలాంటిది తొలి చిత్రమే చేస్తుంటే ఎలా శ్రమిస్తారు?. హీరోగా చిత్రపరిశ్రమలో అడుగుపెట్టి 17 ఏళ్ళు అవుతుంటే ఇంకా ఇప్పుడు తొలి చిత్రం ఏమిటి అని అనుకుంటున్నారా?.. అక్కడికే వద్దాం. ఇదివరకు ప్రిన్స్ కి వివిధ భాషల్లో నుంచి అవకాశాలు వచ్చినా ఒప్పుకోలేదు. తొలి సారి కమర్షియల్ డైరక్టర్ ఏ.ఆర్.మురుగ దాస్ డైరక్షన్లో తమిళ పరిశ్రమలో అడుగుపెడుతున్నారు.

ప్రస్తుతం వీరి కాంబినేషన్లో ఏకకాలంలో తెలుగు, తమిళ భాషల్లో యాక్షన్ థ్రిల్లర్ మూవీ తెరకెక్కుతోంది. తమిళంలో తన తొలి చిత్రం ఎక్కువ థియేటర్లలో వంద రోజులు ఆడాలని సూపర్ స్టార్ భావిస్తున్నారు. అందుకే ఈ చిత్రంపై పూర్తి కాన్సంట్రేషన్ పెట్టారు. 60 శాతం పూర్తి చేసుకున్న ఈ ఫిల్మ్ డిసెంబర్ నాటికి ప్రొడక్షన్ వర్క్ కంప్లీట్ చేసుకోనుంది. అయినా హడావుడిగా రిలీజ్ చేయకూడదని మహేష్ నిర్ణయించుకున్నారు. రెండు భాషల్లో థియేటర్ల లభ్యతను అనుసరించి విడుదలను  ప్లాన్ చేస్తున్నారు. ముందుగా వేసవికి అనుకున్న ఈ చిత్రాన్ని జూన్ కి పోస్ట్ పోన్ చేసినట్లు తాజాగా సమాచారం అందింది.