అక్కినేని హీరోతో శ్రీనువైట్ల సినిమా..?

కామెడీ యాక్షన్ కలగలపు సినిమాలతో సక్సెస్ అందుకొని ఒక్కో మెట్టూ ఎక్కుతూ వచ్చారు శ్రీను వైట్ల. ఆయన కెరీర్ ని ‘దూకుడు’కు ముందు ‘దూకుడు’ తర్వాతగా చెప్పుకోవచ్చు. దూకుడు వరకు ఒకటి రెండు పరాజయాలున్నప్పటికీ ఎక్కువగా హిట్స్ ఉన్నాయి. దూకుడు సినిమా బిగ్గెస్ట్ హిట్ గా నిలిచి అతడి రేంజ్ పెంచింది. సాధారణంగా ఈ స్థాయి విజయం తర్వాత ఎవరి కెరీర్ అయినా ఊపందుకుంటుంది. దానికి విరుద్దంగా శ్రీను వైట్ల గ్రాఫ్ పడిపోయింది. ఆగడు, బ్రూస్లీ ఘోర పరాజయాలుగా మిగిలాయి.వాటినుండి కోలుకుని ప్రస్తుతం వరుణ్ తేజ్ హీరోగా మిస్టర్ సినిమాని తెరకెక్కిస్తున్న శ్రీను వైట్ల తర్వాత అక్కినేని హీరోతో సినిమా చేయాలని ప్రయత్నిస్తున్నారట.

అదీ ఈ మధ్యనే ‘ప్రేమమ్’ లాంటి హిట్ కొట్టిన నాగచైతన్యతో. నాగార్జునతో చేసిన ‘కింగ్’ అనుభవం రూపేణా శ్రీను వైట్ల కథను అక్కినేని వారు ఒప్పుకున్నా ఆ సినిమా పట్టాలెక్కడానికి చాలా సమయం పడుతుంది. కారణం చైతూ ఇప్పటికే ముగ్గురు కృష్ణులతో సినిమాలు చేసేందుకు కమిట్ అయ్యాడు. వారే కళ్యాణ్ కృష్ణ, కృష్ణ, ఇంద్రగంటి మోహన కృష్ణ. ఇవి పూర్తయ్యాక చేస్తారనుకున్నా అది ‘మిస్టర్’ ఫలితం మీదే ఆధారపడి ఉందన్నది బహిరంగ రహస్యమే.