జూలై 2 నుంచి ఓం నమో వెంకటేశా షూటింగ్

కింగ్ నాగార్జున అన్నమయ్య, శ్రీ రామ దాసు, షిరిడి సాయి సినిమాల తర్వాత చేస్తున్న మరో భక్తి రస కథా చిత్రం  “ఓం నమో  వెంకటేశా”. దర్శకేంద్రుడు కె.రాఘవేంద్ర రావు దర్శకత్వంలో ఈ చిత్రం తెరకెక్కనుంది. ఈ సినిమాలో నాగార్జున వేంకటేశ్వరస్వామి భక్తుడు హథీమ్ రామ్ బాబా పాత్ర పోషించనున్నారు.  ఉత్తర భారతదేశానికి చెందిన హథీమ్ రామ్ బాబా తిరుమల శ్రీవారికి భక్తుడు. శ్రీనివాసుడిని నిత్యం భక్తిశ్రద్ధలతో కొలిచేందుకు తిరుపతిలో స్థిరపడిపోయాడు. బాబా పాత్రలో జీవించడానికి కింగ్ ఆయన అలవాట్లు తెలుసుకున్నారు.

రియాలిటీకి దగ్గరగా ఉండాలని  గడ్డాన్నిబాగా పెంచారు. రెండురోజుల క్రితం తిరుమలకి కె.రాఘవేంద్ర రావు తో వెళ్లి సినిమా బాగా రావాలని నాగ్ పూజలు చేశారు. ఈ చిత్రం కోసం  అన్నపూర్ణ స్టూడియోలో తిరుమల సెట్ వేశారు. ఈ సెట్లో జూలై 2 నుంచి మొదటి షెడ్యూల్ మొదలు కానుంది. జె.కె. భారవి కథ అందిస్తున్న ఈ సినిమాలో అనుష్క సన్యాసిగా నటించనుంది. విమల రామన్ కీలక పాత్రలో కనిపించనుంది. ఎం.ఎం.కీరవాణి మరోసారి తన స్వరాలతో వేంకటేశ్వరస్వామికి అభిషేకం చేయనున్నారు. మనం, సోగ్గాడే చిన్ని నాయనా, ఊపిరి సినిమాలతో హ్యాట్రిక్ విజయాలను అందుకున్నతర్వాత కింగ్ నాగార్జున చేస్తున్న సినిమా కావడంతో “ఓం నమో  వెంకటేశా”పై భారీ అంచనాలు ఉన్నాయి.