నంబర్ వన్.. ఈ స్థానం కోసం హీరోలు మాత్రమే కాదు. హీరోయిన్లు పోటీపడుతుంటారు. నటన ప్రదర్శించే పాత్రలు రావాలని కోరుకుంటుంటారు. ఆ రోల్స్ దక్కినవారే నంబర్ వన్ కిరీటాన్ని సొంతం చేసుకుంటారు. తాజాగా సౌత్ ఇండియన్ హీరోయిన్స్ కేటగిరీలో నంబర్ వన్ కుర్చీ నయనతార వశమైంది. సీనియర్‌ హీరోయిన్ అయినప్పటికీ కొత్త హీరోయిన్‌లతో పోటీపడుతూ ఈ స్థానాన్ని కైవసం చేసుకుంది. రీసెంట్ గా ఇండియా టుడే పోల్‌లో కోలీవుడ్‌లో చేసిన ఈ సర్వేలో 21శాతం ఓట్లతో మొదటిస్థానాన్ని దక్కించుకుంది. ‘నానుమ్‌ రౌడీ దాన్‌’ (తెలుగులో నేను రౌడీనే) సినిమాలో నయన్‌ నటనకు మెచ్చి ప్రేక్షకులు ఆమెకు ఫస్ట్‌ ప్లేస్‌ ఇచ్చారు. బాహుబలితో జాతీయ స్థాయిలో గుర్తింపు తెచ్చుకున్న అనుష్క ఈ పోల్‌లో 9 శాతం ఓట్లతో రెండో స్థానంలో నిలిచింది.
తరువాత 8 శాతం ఓట్లతో సమంత, ఓవియా, కీర్తి సురేష్‌ లు ముగ్గురు మూడో స్థానంలో నిలిచారు. ఓవియాకు పెద్ద హిట్ సినిమాలు లేకున్నా.. ఈ పోల్‌లో మూడో స్థానంలో నిలవడానికి బిగ్‌బాస్‌ షో కారణమైందని అధ్యయనకారులు చెప్పారు. సొట్టబుగ్గల సుందరి హన్సిక 7శాతం ఓట్లతో నాలుగో స్థానాన్ని దక్కించుకుంది. ఇక తర్వాతి స్థానాల్లో వరుసగా త్రిష, అమలాపాల్‌, తమన్నా, కాజల్‌, శృతిహాసన్‌లు నిలిచారు. వివాదాలు, విమర్శలు ఎదుర్కొని.. దాటుకొని.. ఎంతోమంది మనసులను గెలుచుకొని నయన టాప్ హీరోయిన్ అయింది. ఆమె ప్రస్తుతం మెగాస్టార్ చిరంజీవి సైరా నరసింహ రెడ్డి లో హీరోయిన్ గా నటిస్తోంది.
