Mollywood: సినిమాలు చేయాలంటే సంతకం చేయాల్సిందే.. కొత్త రూల్‌ తీసుకొస్తున్న ఇండస్ట్రీ!

సినిమా పరిశ్రమ – డ్రగ్స్‌.. ఈ కాంబినేషన్‌ ఇప్పటిది కాదు. ఎన్నో ఏళ్లుగా ఈ పరిస్థితిని చూస్తూనే ఉన్నాం. చాలా కేసులు తేలలేదు కానీ సినిమా పరిశ్రమ మీద ఆ మరక మాత్రం పోలేదు. దీనికి ఏ వుడ్‌ కూడా అతీతం కాదు. అన్ని భాషల సినిమా పరిశ్రమలోనూ ఈ పరిస్థితి ఉంది అని అంటుంటారు. ఇటీవల కాలంలో ఈ విమర్శలు ఎక్కువగా ఎదుర్కొంటున్న పరిశ్రమలు అయితే ఇటు టాలీవుడ్‌, అటు మాలీవుడ్‌. గత కొన్ని నెలలుగా చాలామంది నటులు, నటీమణులు ఈ విమర్శలు చేస్తూ వచ్చారు. ఈ నేపథ్యంలో మలయాళ సినిమా పరిశ్రమ ఓ కీలక నిర్ణయం తీసుకుందని సమాచారం.

Mollywood

మాదక ద్రవ్యాల వాడకం ఆరోపణలతో మలయాళ చిత్ర పరిశ్రమ గత కొన్నేళ్లుగా వార్తల్లో నిలుస్తోన్న విషయం తెలిసిందే. పేరు పొందిన నటులు కూడా షూటింగ్‌ సెట్స్‌లో డ్రగ్స్‌ తీసుకుంటున్నారంటూ కొంతమంది నటీమణులు ఆరోపణలు చేశారు. వీటిని కంట్రోల్‌ చేయాలని అఫిడవిట్‌ కాన్సెప్ట్‌ ఆలోచన చేస్తున్నారట. నటీనటులు ఎవరైనా ప్రాజెక్ట్‌కు ఓకే చెప్పేటప్పుడు తప్పకుండా ‘సెట్స్‌లో డ్రగ్స్‌ ఉపయోగించం’ అని అఫిడవిట్‌పై సంతకం చేయాల్సి ఉంటుందట.

నటీనటులు మాత్రమే కాదు.. వారి సిబ్బంది, డ్రైవర్స్‌ కూడా సంతకం చేయాల్సిందేనట. సంతకాలు చేస్తేనే సెట్‌లోకి అడుగు పెట్టేలా ఆలోచన చేస్తున్నారట. ఈ మేరకు మలయాళ చలన చిత్ర నిర్మాతల అసోసియేషన్‌ నిర్ణయం తీసుకుందని సమాచారం. షూటింగ్‌ లొకేషన్స్‌, పోస్ట్‌ ప్రొడక్షన్‌ పనులు జరిగే ప్రదేశాల్లో కూడా ఈ నిబంధనను వర్తింపజేస్తారట. స్టార్ నటుల నుండి జూనియర్‌ నటుల వరకు ఎవరూ దీనికి అతీతులు కాదట. మరోవైపు సాంకేతిక నిపుణులు కూడా సంతకం పెట్టాల్సిందేనట.

ఆదివారం జరగబోయే మలయాళ నటీనటుల సంఘం సమావేశంలో దీనిపై చర్చ పెడతారని సమాచారం.మలయాళ పరిశ్రమలో కాస్టింగ్‌ కౌచ్‌పై హేమ కమిటీ రిపోర్టు వచ్చింది. ఆ తర్వాత డ్రగ్స్‌ విమర్శలు వచ్చాయి. మాదకద్రవ్యాల వాడకం కోసం సెట్స్‌లో ప్రత్యేకంగా గదులు ఏర్పాటు చేస్తున్నారని నిర్మాత సాండ్రా థామస్ (Sandra Thomas) చెప్పారు. సెట్స్‌లో ఓ నటుడు మాదక ద్రవ్యాల మత్తులో తనతో అసభ్యకరంగా ప్రవర్తించాడని నటి విన్సీ సోనీ అలోషియస్‌ ఆరోపించింది. డ్రగ్స్‌ ఆరోపణలతో నటుడు షైన్‌ టామ్‌ చాకోతోపాటు కొంతమందిని పోలీసులు అరెస్టు చేసిన విషయం తెలిసిందే.

‘కన్నప్ప’ ప్రీ రిలీజ్ ఈవెంట్లో స్పెషల్ అట్రాక్షన్ అయిన డైరెక్టర్ ముకేశ్ కుమార్ సింగ్