“చూడు.. ఒక వైపే చూడు.. రెండోవైపు చూడాలనుకోకు”.. అని సింహా సినిమాలో బాలకృష్ణ అద్భుతంగా డైలాగ్ చెప్పారు. ఆయన తండ్రి ఎన్టీఆర్ బయోపిక్ సినిమా విషయంలోనూ అభిమానులకు ఇదే డైలాగ్ చెబుతున్నారు. తేజ దర్శకత్వంలో ఎన్టీఆర్ గా నందమూరి బాలకృష్ణ నటిస్తున్న ఈ సినిమా షూటింగ్ గతవారం మొదలయిన సంగతి తెలిసిందే. ఎన్‌బీకే ఫిలింస్‌ బ్యానర్‌పై బాలకృష్ణ నిర్మిస్తున్న ఈ సినిమాకు సాయి కొర్రపాటి, విష్ణువర్థన్‌ ఇందూరిలు సహనిర్మాతలుగా వ్యవహరిస్తున్నారు. బాలీవుడ్ ఛాయగ్రాహకుడు సంతోష్‌ తుండియిల్‌ సినిమాటోగ్రఫి అందిస్తున్న ఈ చిత్రాన్ని రెండు భాగాలుగా తీయాలా? వద్దా? అని చిత్ర బృందం ఆలోచనలో ఉంది.
ఆ విషయంలో క్లారిటీ రావడానికి కొంత సమయం పట్టేట్టు ఉంది కానీ.. సినిమాలో చూపించే అంశాలపై మాత్రం తేజ చాలా స్పష్టంగా ఉన్నట్టు సమాచారం. ఎన్టీఆర్ సినీ రంగంలో, రాజకీయరంగంలో సాధించిన విజయాలను మాత్రమే చూపించనున్నారు. సినిమాలో ఎలాంటి వివాదాస్పద అంశాలు ఉండవని తెలిసింది. ముఖ్యంగా ఎన్టీఆర్ వెన్నుపోటు, వైశ్రాయ్ హోటల్ బాగోతం, లక్ష్మీపార్వతితో వివాహం, కుటుంబంలో తగాదాలు లాంటి నెగెటివ్ అంశాలేవీ ఇందులో కనిపించవని టాక్. అంటే ఎన్టీఆర్ జీవితంలోని ఒక వైపు (మంచి) మాత్రమే చూపించనున్నారు. నమదమూరి అభిమానులు ఇది మంచి వార్తే. కీరవాణి సంగీతమందిస్తున్న ఈ సినిమాని దసరాకు రిలీజ్ చేయనున్నారు.
