‘అరవింద సమేత వీర రాఘవ’కి తప్పని లీకుల సమస్య

వరుసగా నాలుగు హిట్లు .. ఆ తర్వాత ఎన్టీఆర్ చేస్తున్న సినిమా అంటే సహజంగానే అంచనాలు ఓ రేంజ్ లో ఉంటాయి. పైగా ఆ చిత్రాన్ని మాటల మాంత్రికుడు త్రివిక్రమ్ శ్రీనివాస్ దర్శకత్వం వహిస్తున్నారు. ఇంకేముంది నందమూరి అభిమానులు మాత్రమే కాదు అందరికన్ను”అరవింద సమేత వీర రాఘవ”పై ఉంది. అందుకే అందంగా, అద్భుతంగా చిత్రీకరించాలని త్రివిక్రమ్ టీమ్ బిజీగా ఉంటే.. ఆ చిత్రీకరణ దృశ్యాలను చూసి మురిసిపోవాలని చాలామంది ఆరాటపడుతున్నారు. ఆ ఆరాటంలోనే లీకుల గోల మొదలయింది. రీసెంట్ గా ఎన్టీఆర్ తండ్రిగా నటిస్తున్న నాగబాబు చావు బతుకుల్లో ఉండగా తారక్ తాపత్రయపడే ఫోటో ఒకటి బయటికి వచ్చింది. దీంతో త్రివిక్రమ్ కఠిన నిర్ణయం తీసుకున్నారు.

చిత్ర యూనిట్ సభ్యులు ఎవరూ షూటింగ్ స్పాట్ కి మొబైల్స్ తీసుకురావద్దని ఆజ్ఞ జారీచేశారు. పైగా షూటింగ్ ఫీల్డ్ లో యూనిట్ సభ్యులు మినహా ఔటర్స్ ని రాకుండా చేయాలనీ ప్రొడక్షన్ టీమ్ ని హెచ్చరించారు. ఈ నిర్ణయం వల్ల లీకులు ఆగుతాయని డైరక్టర్ భావించారు. అయినా తాజాగా ఓ స్టిల్ బయటికి వచ్చింది. తెల్లని కుర్తా, జీన్స్ ప్యాయింట్ వేసుకొని సీరియస్ గా ఎన్టీఆర్ నడుచుకుంటూ వెళ్తున్న ఈ ఫోటో ప్రస్తుతం వైరల్ అయింది. ఈ లీకులు ఎలా అవుతున్నాయో తెలుసుకునే పనిలో చిత్ర బృందం పడింది. హారికహాసిని క్రియేషన్స్ బ్యానర్లో రాధాకృష్ణ నిర్మిస్తున్న ఈ మూవీ అక్టోబర్ 11 న థియేటర్లోకి రానుంది.