ఈ మెషీన్‌ గన్‌ ఫాంటసీ ఏంటో… మాస్‌ ఎలిమెంట్స్‌కి బాప్‌ అయ్యిందిగా!

మాస్‌ సినిమాలు, యాక్షన్‌ సినిమాలు అంటే కత్తులు, గన్నులు కామన్. ఇది ఇప్పుడు కాదు, ఎన్నో ఏళ్లుగా మన సినిమాల్లో గన్నులు చూస్తున్నాం. అయితే అవి పిస్టోల్‌ నుండి మెషీన్‌ గన్‌ వరకు చాలా రకాల గన్స్‌ మనం చూశాం. అయితే ఏ ముహూర్తాన ‘ఖైదీ’ సినిమాలో కార్తి క్లైమాక్స్ ఎపిసోడ్లో మెషీన్ గన్ పట్టి రెచ్చిపోయాడో కానీ… అప్పటి నుండి ఆ గన్‌ మన సినిమాల్లో మాస్‌ ఎలిమెంట్‌కి బాప్‌ అయిపోయింది. అయితే ఇప్పుడు ఆ గన్‌ సైజ్‌ సినిమా సినిమాకూ పెరుగుతోంది.

సందీప్‌ రెడ్డి వంగా బాలీవుడ్ గడ్డపై అడుగుపెట్టి అక్కడి స్టార్‌ హీరో రణ్‌బీర్‌ కపూర్‌తో తెరకెక్కించిన చిత్రం (Anilmal) ‘యానిమల్‌’. ఈ సినిమా ట్రైలర్‌ ఇటీవల విడుదలైంది. అందులో ఓ పెద్ద మెషీన్‌ గన్ కనిపించింది. చూస్తుంటే అది ఓ కారు అంత కనిపిస్తోంది. దీంతో మెషీన్‌ గన్స్‌ గురించి చర్చ పెద్ద ఎత్తున మళ్లీ సాగుతోంది. మన మాస్‌, యాక్షన్‌ సినిమాలకు ఆ గన్‌ సెంటిమెంట్‌గా మారిపోయింది అంటూ నెటిజన్లు కామెంట్లు చేస్తున్నారు.

కార్తి ‘ఖైదీ’ తీసిన లోకేశ్‌ కనకరాజే ఆ తర్వాత ‘విక్రమ్’ సినిమాలో కమల్ హాసన్‌తో ఇంకా పెద్ద మెషీన్ గన్ పట్టించి విధ్వంసం సృష్టించాడు. ఆ సినిమా కూడా తొలి సినిమాలా బ్లాక్‌బస్టర్ అయింది. ఇక ‘కేజీయఫ్‌’ సినిమాలో యశ్‌ – ప్రశాంత్‌ నీల్‌ కలసి మెషీన్ గన్‌పై ఎలా అదరగొట్టారో మనం చూశాం. టాలీవుడ్‌లో అయితే ‘వాల్తేరు వీరయ్య’ సినిమాలో చిరంజీవి కూడా అదే పని చేశారు. మొన్నటికి మొన్న ‘మార్క్ ఆంటోనీ’ సినిమాలో విశాల్ కూడా మెషీన్ గన్స్‌తో రెచ్చిపోయాడు.

చూస్తుంటే ఈ మెషీన్‌ గన్‌ మేనియా ఇంకా చాలా దూరం వెళ్లేలా ఉంది. అంతెందుకు ‘భగవంత్ కేసరి’ సినిమాలో దర్శకుడు అనిల్ రావిపూడి కూడా ఈ గన్‌ ప్రస్తావన తెచ్చాడు. ‘ఈ గన్ను మార్కెట్‌లో పాపులర్ అని అవతలి వ్యక్తి అంటే.. మనకి ఈ సౌండ్ సరిపోదు’ అంటూ బాలయ్య గ్యాస్ సిలిండర్లను ప్రయోగించాడు. సో… మెషీన్‌ గన్‌ని మించి కూడా వచ్చే అవకాశ ఉంది.

మంగళవారం సినిమా రివ్యూ & రేటింగ్!

స్పార్క్ సినిమా రివ్యూ & రేటింగ్!
సప్త సాగరాలు దాటి సైడ్ బి సినిమా రివ్యూ & రేటింగ్!