ధైర్యే సాహసే లక్ష్మి.. అంటుంటారు పెద్దలు. దైర్యంగా సాహసం చేస్తే కాసులు కురుస్తున్నాయని వారి మాట. అందులో వంద శాతం నిజముందని నటి పాయల్ రాజ్ పుత్ విషయంలో మరోసారి రుజువైంది. హిందీలో సీరియల్స్ చేసుకునే ఈ భామ తొలిసారి హీరోయిన్ గా ఆర్ఎక్స్ 100 లో నటించింది. ఇది పాజిటివ్ క్యారెక్టర్ కాదు.. అలాగని సింపుల్ పాత్ర అంతకన్నా కాదు. పేరుకి హీరోయిన్ అయినప్పటికీ ఐటెం గర్ల్ లాగా అందాలు ఆరబోయాలి. నెగటివ్ షేడ్స్ ఉన్న ఈ రోల్ ని చేయడానికి అంగీకరించి తొలి విజయం అందుకుంది. రామ్ గోపాల్ వర్మ స్కూల్లో సినిమా పాటలు నేర్చుకున్న యువ దర్శకుడు అజయ్ భూపతి తెరకెక్కించిన ఈ సినిమా సంచలన విజయం సాధించింది.
పెట్టిన బడ్జెట్ ని రెండురోజుల్లోనే రాబట్టింది. భారీ లాభాల దిశగా దూసుకుపోతోంది. ఈ విజయంలో ఎక్కువ క్రెడిట్ ని హీరో కార్తికేయ కంటే హీరోయిన్ పాయల్ రాజ్ పుత్ కే దక్కింది. ఈ సందర్భంగా ఆమె మాట్లాడింది. “ఎంతో మంది హీరోయిన్లు ఈ పాత్రను నిరాకరించారు. నెగెటివ్ షేడ్ ఉన్న ఇలాంటి డేరింగ్ క్యారెక్టర్ చేయాలంటే ఎంతో ధైర్యం ఉండాలి. నాకు ఆ ధైర్యం ఉంది. అందుకే ఏ మాత్రం భయపడకుండా సినిమాకు ఓకే చెప్పాను” అని పాయల్ స్పష్టం చేసింది. ఆ ధైర్యమే ఇప్పుడు ఆమె అనేక అవకాశాలు తెచ్చిపెడుతోంది.
