ప్రేమమ్ కాంబినేషన్ రిపీట్ అవనుందా?

ఇటీవల ‘ప్రేమమ్’ సినిమాతో హిట్ కొట్టారు అక్కినేని నాగచైతన్య, చందు మొండేటి. మలయాళంలో విజయవంతమైన సినిమాని రీమేక్ చేసి అందరితోను శభాష్ అనిపించుకున్నారు. తాజా సమాచారం ప్రకారం వీరిద్దరూ మరోసారి చేయి కలపనున్నారట. కథ, కథనాలు సహా అన్ని సమకూరిన ఈ సినిమా వెనుక చిన్న కథుంది.దర్శకుడు చందు మొండేటి తన తొలి సినిమా ‘కార్తికేయ’తోనే ప్రేక్షకులతో పాటు పరిశ్రమ వర్గాలనీ ఆకట్టుకున్న సంగతి తెలిసిందే. ఆ సమయంలోనే అక్కినేని కాంపౌండ్ నుండి కబురు రాగా చందు తాను రాసుకున్న ఓ కథ చెప్పి వారిని మెప్పించాడు. అదే ఊపులో స్క్రిప్ట్ కూడా సిద్ధం చేశాడు చందు. ‘ప్రేమమ్’ సినిమా నిర్మాతలే అప్పట్లో చైతూతో సినిమా చేయడానికి ప్రయత్నాలు చేస్తున్నారు. వీరికి ఆ కథ నచ్చింది. అయితే సరిగ్గా అదే సమయానికి మలయాళ ‘ప్రేమమ్’ విడుదలై దానికొస్తున్న స్పందన చూసి మనసు మార్చుకున్నారు నిర్మాతలు. చైతూని నిర్మాతలు ఒప్పిస్తే, చైతూ చందుని ఒప్పించాడు.

మొత్తంగా అందరూ మంచి హిట్ కొట్టారు.అయితే చందు సొంత కథ మాత్రం అలాగే ఉండిపోయింది. ఆ కథ చైతూకి బాగా నచ్చడంతో ఎప్పటికైనా మనమే చేద్దామని చందు దగ్గర మాట తీసుకున్నాడట. దీనికి తోడు ‘ప్రేమమ్’తో వాళ్ళు వీళ్ళు అని లేకుండా చందు ప్రతిభకు అందరూ ముగ్దులయిపోయారు. అటు అక్కినేని వారికి కూడా చందుపై ఉన్న నమ్మకం రెట్టింపైంది. “ప్రేమమ్ ప్రచారంలో చందు సొంత కథైతే ఇంకా బాగా తీసేవాడు. అతడితో ఎప్పుడైనా సినిమా చేసేందుకు సిద్ధమని” చైతూ అనడం గమనించవచ్చు. దాంతో ఇప్పుడు చందు ‘కథ’ మళ్ళీ బయటికొచ్చింది. అయితే చైతూ కోసం ఇప్పటికే ముగ్గురు నలుగురు దర్శకులు వేచి చూస్తున్నారు. వచ్చే ఏడాది పెళ్లి కూడా చేసుకుంటున్నాడు. అటు చందు కూడా కార్తికేయ సీక్వెల్ సహా మరి కొన్ని సినిమాలు కమిట్ అయ్యాడట. అంచేత ఈ చైతు-చందు కలిసేది 2018 సెకెండాఫ్ నాటికే.

https://www.youtube.com/watch?v=hDwFHDDqm4Q