90ల్లో యాంగ్రీ “యంగ్ మన్” గా గుర్తింపు తెచ్చుకున్న రాజశేఖర్ ఈ మధ్య కాలంలో ఒక్క విజయాన్ని నమోదు చేయలేదు. అటు చేతిలో అవకాశాలూ లేవు. తేజ ‘అహం’ సినిమాతో సెకెండ్ ఇన్నింగ్స్ ప్రారంభిస్తారనుకున్నా అది పట్టాలెక్కలేదు. ఈ మధ్య కాలంలో జగపతి బాబులా విలన్ వేషాలతో ఈ అల్లరి ప్రియుడు రీఎంట్రీ ఇస్తారని ప్రచారం జరుగుతోంది. ఇది వాస్తవమయ్యే రోజు ఎక్కడుందో గానీ రాజశేఖర్ కుమార్తె శివాని హీరోయిన్ గా ఎంట్రీ ఇచ్చే రోజు మాత్రం దగ్గర్లోనే ఉందని ఫిలిం నగర్ వర్గాలు చెబుతున్నాయి.
నిజానికి ఈ వార్త చాలా కాలంగా వినవస్తోన్నదే అయినా ప్రస్తుత పరిస్థుతుల దృష్ట్యా ఆమె తెరంగ్రేట్రం ఖాయమే అని సమాచారం. నాగశౌర్య హీరోగా తెరకెక్కనున్న ఓ సినిమాలో శివాని హీరోయిన్ గా నటించనుందిట. థ్రిల్లర్ గా రూపొందనున్న ఈ సినిమాని వారాహి చలన చిత్రం సంస్థ నిర్మించనున్నారట. అంచేత ఇది రాజశేఖర్ కుమార్తెకు సువర్ణావకాశమే. అయితే శివాని తల్లిదండ్రులు మాత్రం ఈ విషయాలను అప్పుడే బహిర్గతం చేయకూడదని అనుకుంటున్నారట. ఏదేమైనా తెలుగులో తారల ‘తనయ’లు తెరమీదికొస్తున్నారన్నది అసలు విషయం.
Home
