రవితేజ, కళ్యాణ్ కృష్ణ సినిమాలో హీరోయిన్ ఫిక్స్

మాస్ మహారాజ్ రవితేజ ప్రస్తుతం నూతన దర్శకుడు విక్రమ్ సిరికొండతో ‘టచ్ చేసి చూడు’ సినిమా చేస్తున్నారు. లక్ష్మీ నరసింహ ప్రొడక్షన్స్ పతాకంపై నల్లమలుపు శ్రీనివాస్ (బుజ్జి), వల్లభనేని వంశీ నిర్మిస్తున్న ఈ మూవీ వేగంగా షూటింగ్ జరుపుకుంటోంది. వక్కంతం వంశీ రాసిన ఈ కథలో మాస్ మహారాజ్ మరోసారి పోలీస్ గా అదరగొట్టనున్నారు. ఈ మూవీ జనవరిలో రిలీజ్ చేయడానికి చిత్ర బృందం ప్రయత్నిస్తోంది. దీని తర్వాత సోగ్గాడే చిన్ని నాయన, రారండోయ్ వేడుక చూద్దాం సినిమాలని తెరకెక్కించిన కళ్యాణ్ కృష్ణ దర్శకత్వంలో సినిమా చేయనున్నారు. కామెడీ ఎంటర్ టైనర్ గా తెరకెక్కనున్నఈ సినిమాకి “నేల టికెట్” అని పేరు పరిశీలిస్తున్నారు. జనవరి మొదటివారంలో రెగ్యులర్ షూటింగ్ ప్రారంభం కానున్న ఈ సినిమాకు శక్తికాంత్ సంగీతం అందిస్తున్నారు.

అలాగే హీరోయిన్ కూడా ఫిక్స్ అయినట్లు తెలిసింది. ఈ సినిమా ద్వారా మాళవిక శర్మ అనే బ్యూటీ హీరోయిన్ గా పరిచయం కానుంది. మోడల్ గా తన అందాలతో అభిమానులను సొంతం చేసుకున్న ఈ సుందరి రవితేజతో కలిసి డ్యాన్సులు వేయనుంది. ఈ సినిమా తర్వాత రవితేజ శ్రీను వైట్లతో కలిసి పనిచేయనున్నారు. మైత్రి మూవీ మేకర్స్ వారు నిర్మించనున్న ఈ సినిమాకి ప్రీ ప్రొడక్షన్ సాగుతోంది. వరుసగా ఈ మూడు సినిమాలు వచ్చే ఏడాది రిలీజ్ కానున్నాయి.