వరుసబెట్టి ట్రిపుల్, డబుల్ రోల్స్ ప్లే చేయనున్న రవితేజ!

ఒక సినిమాలో రెండుమూడు పాత్రలు పోషించడం అంటే చాలా కష్టమైన పని. అందుకే మన హీరోలు ఒక సినిమాలో ఎప్పుడైనా డబుల్ రోల్ లేదా ట్రిపుల్ రోల్ ప్లే చేస్తే కనీసం ఏడాది లేక రెండేళ్ల వరకూ అలా రెండు మూడు పాత్రలు పోషించే సినిమాలు ఒప్పుకోరు. కానీ.. హీరోలందు మాస్ మహారాజా వేరయ్యా అన్నట్లు.. రవితేజ ఎనర్జీ లేవల్స్ ముందు ఎవరు మాత్రం నిలదొక్కుకోగలరు చెప్పండి. అందుకే “అమర్ అక్బర్ ఆంటోనీ” చిత్రంలో ట్రిపుల్ రోల్ అనంతరం ఇమ్మీడియట్ గా “తేరీ” రీమేక్ లో మళ్ళీ రెండు విభిన్నమైన పాత్రల్లో నటించనున్న రవితేజ.. ఆ సినిమా తర్వాత తెరకెక్కనున్న వి.ఐ.ఆనంద్ సినిమాలో డబుల్ రోల్ ప్లే చేయనున్నాడని తెలుస్తోంది. ఈ సినిమా వచ్చే ఏడాది సెట్స్ మీదకు వెళ్తుంది.

రవితేజ నటించిన “టచ్ చేసి చూడు, నేల టికెట్టు” చిత్రాలు బాక్సాఫీస్ వద్ద బొక్కబోర్లా పడడంతో.. తన తదుపరి చిత్రాల విషయంలో ఇంకాస్త ఎక్కువ జాగ్రత్త తీసుకొంటున్నాడు రవితేజ. అందుకే వరుసబెట్టి ఇలా ట్రిపుల్, డ్యూయల్ రోల్స్ ప్లే చేస్తూ బాగా కష్టబడుతున్నాడు. మరి రవితేజ కష్టం ఆయనకి విజయలక్ష్మిని దగ్గరకు చేరుస్తుందేమో చూడాలి.