అజయ్ కి వినూత్నంగా శుభాకాంక్షలు చెప్పిన కార్తికేయ!

కష్టాల్లో ఉన్నప్పుడు సాయపడిన వారిని ఎవరైనా కలకాలం గుర్తించుకుంటారు. గౌరవిస్తారు. అలాగే ఒక్క ఛాన్స్ అంటూ కాళ్లు అరిగేలా తిరిగి.. అలసిపోయిన కార్తికేయకి హీరోగా అవకాశం ఇచ్చిన  అజయ్ భూపతి అంటే చాలా గౌరవం. తనతో ‘ఆర్ఎక్స్ 100’ సినిమా తీసి హిట్ ఇచ్చిన డైరక్టర్ ని బాస్ అని పిలుచుకుంటారు. తన బాస్ నిన్న ఓ ఇంటివాడయ్యాడు. తూర్పు గోదావరి జిల్లా ఆత్రేయపురానికి చెందిన శిరీషతో అజయ్ వివాహం హైదరాబాద్ లో శనివారం వైభవంగా జరిగింది. ఈ వివాహ వేడుకలో అజయ్ భూపతి, శిరీష జంటతో దిగిన ఫొటోలను ట్విట్టర్ లో అభిమానులతో పంచుకుంటూ వినూత్నంగా శుభాకాంక్షలు చెప్పారు.

“నా బాస్ అజయ్ భూపతికి బాస్ వచ్చేశారు. శుభాకాంక్షలు సార్” అని ట్వీట్ చేశారు. ఈ ట్వీట్ ఎక్కువమందిని ఆకట్టుకుంది. ఇక అజయ్ విషయానికి వస్తే అతను రెండేళ్ల క్రితమే శిరీషకు ప్రపోజ్ చేశారు. అజయ్  ప్రేమకు శిరీష అంగీకరించినా ఆమె ఇంట్లో వాళ్లు ఒప్పుకోలేదు. జీవితంలో సెటిల్ కాకపోవడమే అందుకు కారణమని శిరీష పేరెంట్స్ చెప్పడంతో… దీంతో తనకు రెండేళ్ల సమయం ఇస్తే సక్సెస్ ఫుల్ డైరెక్టర్ గా మారతానని అజయ్ కోరారు. కసిగా ఆర్ఎక్స్ 100 సినిమా తీసి హిట్ కొట్టి శిరీష్ మేడలో తాళికట్టారు. రీల్ కథలో ప్రేమను గెలిపించకపోయినా.. రియల్ ప్రేమ కథను అజయ్ గెలిపించుకున్నారు.