మంచు విష్ణు, అఖిల్ కి కుదరనిది సాయిధరమ్ తేజ్ కి సెట్ అవుతుందా .!

ఇది సెంటిమెంటో లేక మరింకోకటో అర్ధం కాదు కానీ.. ఇప్పటివరకూ ఇండస్ట్రీలో తమ పేర్లు టైటిల్స్ గా పెట్టుకొని కథానాయకులుగా నటించిన ఒక్క సినిమా కూడా హిట్ అవ్వలేదు. మంచు విష్ణు పరిచయ చిత్రం “విష్ణు”, అఖిల్ పరిచయ చిత్రం “అఖిల్” అందుకు నిదర్శనం. ఈ రెండు సినిమాలూ బాక్సాఫీస్ వద్ద దారుణంగా బోల్తా కొట్టడమే కాక సదరు హీరోల కెరీర్ లో బిగ్గెస్ట్ ఫ్లాప్స్ గా నిలిచాయి. అందుకే విష్ణుకి అఖిల్ కి మధ్యలో కానీ.. అఖిల్ తర్వాత కానీ తమ పేరుని మహా అయితే ఏదైనా పాట కోసం వాడుకున్నారే కానీ.. టైటిల్ గా మాత్రం పెట్టుకోవడానికి ఇష్టపడలేదు, ధైర్యం చేయలేదు కూడా.

అయితే.. మళ్ళీ ఇన్నాళ్ళ తర్వాత మరో హీరో తన పేరును టైటిల్ గా పెట్టుకోవడానికి ముందుకొచ్చాడు. సాయిధరమ్ తేజ్ తాను కరుణాకరణ్ దర్శకత్వంలో నటిస్తున్న చిత్రానికి “తేజ్ ఐ లవ్ యూ” అనే టైటిల్ ఫిక్స్ చేయించుకొన్నాడు. సాయిధరమ్ తేజ్ సరసన అనుపమ పరమేశ్వరన్ కథానాయికగా నటిస్తున్న ఈ చిత్రాన్ని క్రియేటివ్ కమర్షియల్స్ పతాకంపై కె.ఎస్.రామారావు నిర్మిస్తున్నారు. ఈ చిత్రం ఫస్ట్ లుక్ పోస్టర్ ను ఇవాళ విడుదల చేశారు. అసలే చాలా బ్యాడ్ ఫేస్ లో నడుస్తున్న తేజు కెరీర్ కి ఇప్పుడు ఈ టైటిల్ సెంటిమెంట్ ఏమైనా అడ్డుపడుతుందా లేక మెగా హీరో తేజ్ ఈ టైటిల్ సెంటిమెంట్ ను బ్రేక్ చేసి హీరోగా హిట్ కొడతాడా అనేది వేచి చూడాల్సిందే.