సల్మాన్ ఖాన్ హీరోగా తెరకెక్కిన ‘ఏక్ థా టైగర్’ సినిమాకి సీక్వెల్ వస్తున్నట్టు ఇటీవల ప్రకటించిన సంగతి తెలిసిందే. ‘టైగర్ – జిందా హై’ పేరుతో రానున్న ఈ సినిమా వచ్చే ఏడాది ప్రథమార్థంలో సెట్స్ పైకి వెళ్లనుంది. టైగర్ అంటే.. చూపుల్లో వాడి, కదలికలో వేగం ఉండాలి. కండలవీరుడు సల్మాన్ తెరపై ఇదే తీరున కనపడతాడు గనక ఈ టైటిల్ సల్లూభాయ్ కి సరైనది అని అనుకున్నారు. అయితే 70 సంవత్సారాల ముదుసలి పాత్రలో సల్మాన్ దర్శనమివ్వనున్నాడట. యశ్ రాజ్ ఫిలిమ్స్ బ్యానర్ పై ఆదిత్య చోప్రా నిర్మించనున్న ఈ సినిమాలో సల్మాన్ పాత్ర రెండు కోణాల్లో (ప్రస్తుతం, గతం) సాగుతుందని సమాచారం.
‘సుల్తాన్’ ఫేమ్ అలీ అబ్బాస్ జాఫర్ దర్శకత్వం వహించనున్న ‘టైగర్ – జిందా హై’లో సల్మాన్ ‘రా’ (రీసెర్చ్ అండ్ ఎనాలిసిస్) ఏజెంట్ గా కనపడనున్నాడు. కబీర్ ఖాన్ ‘భజరంగీ భాయీజాన్’, అలీ అబ్బాస్ జాఫర్ ‘సుల్తాన్’ సినిమాలతో భారీ విజయాలందుకున్న సల్మాన్ మళ్ళీ వారిద్దరితో పని చేస్తుండగా.. కబీర్ ఖాన్ ‘ఏక్ థా టైగర్’ సీక్వెల్ ని అలీ అబ్బాస్ తెరకెక్కించడం విశేషం. వచ్చే ఏడాది క్రిస్మస్ నాటికి తెరమీదికి రానున్న ఈ సినిమాలో కత్రినాతో మరోసారి జంట కట్టనున్నాడు సల్మాన్. ఇదిలా ఉంటే సల్మాన్-కబీర్ ఖాన్ కలయికలో తెరకెక్కుతోన్న ‘ట్యూబ్ లైట్’ వచ్చే ఏడాది ప్రేక్షకుల ముందుకు రానుంది.
