క్రేజీ కాంబినేషన్ సెట్ కానుందా..?

January 18, 2021 / 01:59 PM IST

Join Us

ప్రస్తుతం సినిమా ఇండస్ట్రీలో ఓ క్రేజీ వార్త హల్చల్ చేస్తోంది. ఇదే నిజమైతే గనుక సెన్సేషనల్ కాంబినేషన్ ని వెండితెరపై చూసే ఛాన్స్ రాబోతుంది. అసలు విషయంలోకి వస్తే.. పవర్ స్టార్ పవన్ కళ్యాణ్ తో కలిసి నటించాలని మెగా హీరోలు చాలా కాలంగా ఎదురుచూస్తున్నారు. కానీ ఆ ఛాన్స్ ఎవరికీ రావడం లేదు. ఇప్పుడు రామ్ చరణ్ కి అలాంటి అవకాశం వచ్చినట్లుగా చెబుతున్నారు. వీరిద్దరి కాంబినేషన్ లో సినిమా అంటే ఎంతటి సెన్సేషన్ క్రియేట్ చేస్తుందో ప్రత్యేకంగా చెప్పనక్కర్లేదు. అలాంటి సినిమాను స్టార్ డైరెక్టర్ శంకర్ రూపొందించబోతున్నారంటే ఇంకా సెన్సేషనల్ న్యూస్ అవుతుంది.

ఈ కాంబినేషన్ ను సెట్ చేయడానికి ఓ బడా తెలుగు నిర్మాత ప్రయత్నాలు ప్రారంభించారు. ఇందులో భాగంగా శంకర్ ఇప్పటికే చరణ్ కు, నిర్మాతకు నేరేషన్ ఇచ్చారని టాక్. ఇంకా పవన్ కళ్యాణ్ తో చర్చించాల్సివుంది. ఆయన ఓకే చెబితే సినిమా సెట్ అయిపోయినట్లేనని చెబుతున్నారు. రామ్ చరణ్ మెయిన్ హీరో అయినప్పటికీ.. పవన్ కళ్యాణ్ పాత్ర కూడా పూర్తి నిడివితో ఉంటుందని సమాచారం. గతంలో శంకర్ రూపొందించిన సినిమాల మాదిరిగా అవుట్ అండ్ అవుట్ కమర్షియల్ సినిమాగా దీన్ని రూపొందించబోతున్నారని తెలుస్తోంది.

ఎలాంటి గ్రాఫిక్స్ వర్క్ ఉండదు కాబట్టి వీలైనంత త్వరగా షూటింగ్ పూర్తి చేసే ఛాన్స్ ఉంది. ప్రస్తుతం శంకర్ చేయాల్సిన సినిమా ‘ఇండియన్ 2’కి బ్రేక్ పడింది. కమల్ హాసన్ రాజకీయాల్లో బిజీగా ఉన్నారు కాబట్టి సినిమా ఎప్పుడు సెట్స్ పైకి వస్తుందో తెలియదు. ఈలోగా శంకర్ ఈ సినిమాను పూర్తి చేయాలని ప్లాన్ చేస్తున్నారు. ‘ఆర్ఆర్ఆర్’, ‘ఆచార్య’ సినిమాల తరువాత చరణ్ చేసే సినిమా ఇదే కావొచ్చని చెబుతున్నారు.