అప్పటివరకు అంతెత్తు ఎగిరి.. రిలీజ్‌ అయ్యాక సినిమా పోతే వెంటనే గంప కిందకు వెళ్లిపోయిన కోడి లాంటి హీరోలు ఉన్న టాలీవుడ్‌లో ఓ హీరో తన రెమ్యూనరేషన్ నుండి కొంత వెనక్కి ఇచ్చేస్తున్నాడు. వినడానికి కొంత ఆశ్చర్యకరంగా ఉన్నా.. ఇది నిజమే అంటున్నారు. గత కొన్ని రోజులుగా తన గత సినిమా హీట్‌ ఆ హీరోను ఇబ్బంది పెడుతోంది. ఇక కొత్త సినిమా వచ్చేస్తున్న సమయంలో పాత సమస్య ఎందుకు అనుకున్నాడో ఏమో కొంత రెమ్యూనరేషన్ వెనక్కి ఇచ్చేస్తున్నాడు.
ఇక్కడ సమస్య తెచ్చిన సినిమా ‘జాక్’(Jack). ఆ హీరో సిద్ధు జొన్నలగడ్డ (Siddu Jonnalagadda) ప్రతిష్ఠాత్మకంగా తీసుకొని చేసిన చిత్రం ‘జాక్’. తన హిట్‌ ఫార్ములా అయిన కామెడీ – యాక్షన్‌ జోనర్‌లోనే ఈ సినిమా కూడా వచ్చింది. భారీ ఎత్తున ప్రచారం చేయడంతో సినిమా మీద హైప్‌ క్రియేట్‌ అయ్యింది. అయితే బాక్సాఫీసు దగ్గర మాత్రం దారుణమైన ఫలితాన్ని చవిచూసింది. దీంతో సినిమా నిర్మాతకు బీవీఎస్‌ఎన్‌ ప్రసాద్‌కు భారీ నష్టం వచ్చింది.
ఇప్పుడు దానిని కాస్తయినా పూడ్చే పనిలో పడ్డాడట సిద్ధు జొన్నలగడ్డ (Siddhu Jonnalagadda). దీంతో ‘జాక్’ సినిమా నష్టాల కథ కంచికి చేరబోతోంది అని చెప్పాలి. తన రెమ్యూనరేషన్ నుండి రూ. నాలుగు కోట్లు వెనక్కు ఇవ్వాలని సిద్ధు డిసైడ్ అయినట్లు తెలుస్తోంది. ఈ మేరకు పేమెంట్‌ వెనక్కి ఇవ్వడంతోపాటు.. ఆ విషయాన్ని ఘనంగా ప్రేక్షకులకు తెలియజేసే ఆలోచనలో కూడా ఉన్నాడు. అలా యువ హీరోలకు, సీనియర్‌ హీరోలకు మరోసారి వెనక్కి ఇచ్చేయడంలో ఉన్న ఆనందాన్ని, సంతృప్తిని తెలియజేస్తున్నాడు.
అయితే గతంలో కొంతమంది హీరోలు ఇలా ఇచ్చేశారు. ఈ మధ్య కాలంలో అయితే ఎవరూ చేయలేదు. టాలీవుడ్‌లో ఇలాంటి డిజాస్టర్లు ఇటీవల కాలంలో చాలామంది హీరోల సినిమాలకు ఎదురయ్యాయి. మరి ఆ హీరోలు ఇలా ఏమన్నా ఆలోచిస్తారేమో చూడాలి. ఇక సిద్ధు కొత్త సినిమా ‘తెలుసు కదా’ సినిమా అక్టోబరు 17న రిలీజ్‌ చేస్తామని ఇటీవల ప్రకటించారు. ఆ వెంటనే రెమ్యూనరేషన్ వెనక్కి నిర్ణయం బయటకు వచ్చింది.
