అఖిల్ ని నమ్మి అంత పెడుతున్నారా..?

December 21, 2020 / 12:58 PM ISTByFilmy Focus

Join Us

అక్కినేని ఫ్యామిలీ నుండి హీరోగా ఎంట్రీ ఇచ్చిన అఖిల్ ఇప్పటివరకు సరైన హిట్ అందుకోలేకపోయారు. అయినప్పటికీ అఖిల్ సినిమాల బడ్జెట్ మాత్రం పెరిగిపోతూనే ఉంది. ప్రస్తుతం అఖిల్ ‘మోస్ట్ ఎలిజిబుల్ బ్యాచిలర్’ సినిమాలో నటిస్తున్నాడు. ఈ సినిమా బడ్జెట్ అనుకున్న దానికంటే ఇరవై శాతం ఎక్కువ ఖర్చయిందని చెబుతున్నారు. ఈ విషయం పక్కన పెడితే అఖిల్ వచ్చే నెలలో తన కొత్త సినిమాను మొదలుపెట్టవుతున్నాడు. దర్శకుడు సురేందర్ రెడ్డి రూపొందిస్తోన్న ఈ సినిమా బడ్జెట్ ఎంతో తెలుసా..? అక్షరాలా రూ.40 కోట్లు.

ప్రీప్రొడక్షన్ స్టేజ్ లో అనుకున్న లెక్కలు ఇవి. సెట్స్ పైకి వెళ్లిన తరువాత మరో ఆరేడు, కోట్లు ఎక్కువ అవుతుందని అంచనా వేస్తున్నారు. అఖిల్ లాంటి హీరో మీద ఇంత బడ్జెట్ పెడితే వర్కవుట్ అవుతుందా..? అనేది ఇప్పుడు ప్రశ్నార్ధకంగా మారింది. పెట్టిన బడ్జెట్ కి మించి అఖిల్ సినిమా వసూళ్లు రాబట్టగలదా..? అనే విషయంలో ఎవరికీ క్లారిటీ లేదు. డిజిటల్, శాటిలైట్, థియేట్రికల్, హిందీ డబ్బింగ్ ఇలా అన్నీ కలుపుకొని చూసుకుంటే అఖిల్ మార్కెట్ పాతిక కోట్లు కూడా లేదు. ఇవన్నీ లెక్కలేసుకొనే అఖిల్ మీద ఇంత బడ్జెట్ పెట్టడానికి రెడీ అవుతున్నాడు అనీల్ సుంకర.

ఈ విషయం తెలిసిన వారంతా ఆశ్చర్యపోతున్నారు. ఫైనాన్షియర్లు కూడా ఈ ప్రాజెక్ట్ విషయంలో వెనకడుగు వేసినట్లు తెలుస్తోంది. ఇన్ని ప్రతికూల అంశాలు ఉన్నప్పటికీ నిర్మాత అనీల్ సుంకర మాత్రం ఈ ప్రాజెక్ట్ విషయంలో చాలా నమ్మకంగా ఉన్నారు. ఈ సినిమా కోసం అఖిల్ బాడీ బిల్డ్ చేయడంతో పాటు నెల రోజులు గుర్రపు స్వారీ కూడా ప్రాక్టీస్ చేశాడు. స్పై థ్రిల్లర్ నేపథ్యంలో రాబోతున్న ఈ సినిమాలో రష్మికని హీరోయిన్ గా తీసుకోబోతున్నారని సమాచారం.