తాను ఐటెం సాంగ్స్ చేయడం వెనుక కారణాన్ని చెప్పిన తమన్నా

మిల్కీ బ్యూటీ తమన్నాకి హ్యాపీడేస్ సినిమా నుంచి మంచి రోజులు మొదలయ్యాయి. అప్పటి నుంచి వెనుతిరిగి చూసుకోలేదు. బహుబలి సినిమాలో అద్భుతమైన పాత్ర చేసింది. ఆ తర్వాత జయేంద్ర దర్శకత్వంలో కళ్యాణ్ రామ్ కి జోడీగా “నా నువ్వే” చిత్రాన్ని చేసింది. ఇందులో కొత్తగా కనిపించి మంచి పేరు తెచ్చుకుంది. ప్రస్తుతం బాలీవుడ్ లో కంగనా రనౌత్ చేసిన క్వీన్ తెలుగు వెర్షన్ లో క్వీన్ గా నటిస్తోంది. మెగాస్టార్ చిరంజీవి సైరా నరసింహారెడ్డిలోను కీలకరోల్ పోషిస్తోంది. అలాగే డైరక్టర్ అనిల్ రావిపూడి దర్శకత్వంలో తెరకెక్కుతోన్న మల్టీస్టారర్ మూవీ F2 లోను విక్టరీ వెంకటేష్ సరసన కనిపించనుంది. ఈ షూటింగ్ లో బిజీగా ఉన్న తమన్నా ఓ ఇంటర్వ్యూలో పాల్గొని ఆసక్తికర సంగతులు చెప్పింది.

స్టార్ హీరోయిన్ అయినప్పటికీ ఐటెం సాంగ్స్ చేయడానికి గల కారణాన్ని వెల్లడించింది. “ఏ సినిమా ఇండస్ట్రీ లోనైన ఎక్కువగా కమర్షియల్ చిత్రాలే నిర్మిస్తారు. అందుకే హీరోయిన్స్ రోల్స్ కి ప్రాధాన్యం చాలా తక్కువుగా ఉంటుంది. ఆ ఉన్న కొన్ని సన్నివేశాల్లోనే మా టాలెంట్ ను చూపించాలి. ప్రేక్షకులతో పాటు దర్శక నిర్మాతలను కూడా ఆకట్టుకోవాలి. అందుకే నేను ఎక్కువుగా డ్యాన్స్ వైపే మొగ్గు చూపుతా. ఆ కారణంగానే కొన్ని ఐటెం సాంగ్స్ చేసాను” అని వెల్లడించింది. తనకి గుర్తింపు రావడం వెనుక డాన్స్ ప్రధాన కారణమని కూడా చెప్పింది. రీసెంట్ గా జై లవకుశలో “స్వింగ్ జరా” పాట స్టెప్పులు వేసిన భామ, రామ్ చరణ్, బోయపాటి శ్రీను సినిమాలోనూ ఓ ప్రత్యేక పాటలో డాన్స్ తో అదరగొట్టనున్నట్టు సమాచారం.